©almaty.tv
Көшеміз сатылып кетіп, үйімізге кіріп-шыға алмай қалдық. Осылай жанайқайын жеткізген Алматы облысы Абай ауылындағы 20-ға жуық отбасы мәселенің шешілуін сұрайды, деп хабарлайды Almaty.tv телеарнасы.
12 жыл бойы осы жолмен жүріп келдік деген жұрт "бір жарым жыл бұрын жер иесі табылып, аумақты қоршап алды" деп ашулы.
"Көшесіз қалған" Қарасай ауданына қарасты Абай ауылының тұрғындары үйіне өзен айналып кіріп, көлігін көше жиегіне тастап жүргелі жылдан асыпты. Қоршау артында қалған кей заттарын кранмен тасып, қазір бөтен үйдің ауласы арқылы өтіп жүр екен.
«Екі мүгедек немерем бар, біреуі алты жаста, екіншісі тоғыз жаста. Осы қиыншылықты бір жарым жылдан бері көріп жатырмыз. Жедел жәрдем, басқа қызмет түрін шақыра алмаймыз, келе алмайды», – дейді Абай ауылының тұрғыны Райхан Буранова.
Ал шамамен жарты жыл бұрын «көше тұрғындарға қайтарылсын» деген сот шешімі шығыпты. Тұрғындардың айтуынша, жер иесінен хабар жоқ.
«Бұл жерді ашу керек. Бәрімізде құжат бар, норматив орындалған. Әкім жұмыс істемейді. Әкімге барамыз, үнемі ауырып қалады. Міне, соттың шешімі шыққанына қанша уақыт болды», – дейді ауыл тұрғыны Берікжан Құлшанов.
Жолсыз қалған абайлықтар бүгін аудан орталығына барып, облыс әкіміне де дәл осы көше мәселесін шешіп беруін сұрады. Қарасай ауданы халқымен кездесуге келген Марат Сұлтанғазиев жағдайды бақылауға алатынын айтты.
«Мынау құқық қорғау органдары, прокуратура, сот орындаушылары аудан әкімімен бірге жұмысты аяқтасын. Жақын арада соттың шешімін орындауға жұмыс жасаймыз», – деді Алматы блысының әкімі.
«Соттың шешімі орындамағаны үшін Райымбек ауылының әкіміне сот арқылы 50 АЕК айыппұл салдық. Егер қазір газ құбырынан 1 мм тесік шықса, бір қызмет кіріп оны жөндей алмайды. Бір көшенің тұрғындарынан айрыламыз», – деді заңгер Мадияр Аймырзаұлы.
Жауаптылар облыс әкіміне мәселені шешетінін жеткізді.
643 рет оқылды
