Елордада коронавирус жұқтырған науқастың ең кішісі - 14, ал үлкені 59 жаста. Бұл туралы Орталық коммуникациялар қызметіндегі брифингте Нұр-Сұлтан қаласы Қоғамдық денсаулық сақтау басқармасының басшысы Сәуле Қисықова айтты, деп хабарлайды ҚазАқпарат.
«Коронавирус жұқтырған елордадағы 18 адам да Қазақстан азаматтары. Ең кішісі - 14 жаста, екі адамның жасы 59-да. Жалпы, вирус жұқтырғандардың 70 пайызы 30 бен 49 жас аралығындағы азаматтар. Барлығының жағдайы жақсы, дене қызулары қалыпты. Қажетті емдеу шаралары жасалып, медициналық көмек көрсетіліп жатыр», - деді ол БАҚ өкілдерінің сауалына орай.
Сонымен қатар басқарма басшысы коронавирус жұқтырған адамдарды емдеп жатқан медицина қызметкерлері үйлеріне бармайтындығын атап өтті.
«Инфекция анықталған аурулар жатқан мекемедегі 60-тан астам дәрігер мен мейірбикелер сол жерден шықпайды. Ғимараттың бір бөлігінде оларға жағдай жасалған. Жұмыс уақыты біткен соң сол жерде демалып, тамақтанады. Содан кейін келесі ауысымға жұмысқа түседі. Бұл індетке байланысты қолға алған шарамыз», - деді Сәуле Қисықова.
1010 рет оқылды
