Фото: elements.envato.com
Кентау қаласында қоғамдық дәмханадан уланғандар саны сағат сайын артып барады, деп хабарлайды Sputnik Қазақстан.
Түркістандағы өңірлік коммуникациялар қызметінде шұғыл түрде брифинг өтті. Брифингте қазіргі уақытта астан уланғандар саны 92-ге жеткені айтылды.
"Жұқпалы аурулар бөлімшесіне 92 адам шағымданып келген. Барлығының ыстығы көтеріліп, іштері өткен. 26 маусымда Кентау қаласының дәмханасынан тамақ ішкен. Қазіргі таңда 67 науқас жатқызылды. Оның 40-ы бала, 27 - ересек адам, 3 - жүкті әйел. Барлығының жағдайы орташа ауыр. Ертеңгі күннен бастап жағдайлары жақсарса, үйіне шығарыла бастайды", - дейді Кентау қалалық орталық аурухана бас дәрігерінің орынбасары Асылбек Өтебаев.
25 адам амбулаториялық емдеуде, олардың да жағдайы қатаң бақылауда.
Жұқпалы аурулар бөлімшесінде 40 орын болған, қосымша 40 төсек-орын қойылған.
Науқастардың көбі пицца жеген.
"Науқастардың саны әлі де көбеюі мүмкін. Алайда алдыңғы күнге қарағанда науқастар саны тұрақталып келеді", - деді Асылбек Өтебаев.
Қазіргі күні тергеп-тексеру амалдары жүріп жатыр. ҚК 304 бабы 1-бөлімімен қылмыстық іс қозғалды. Нысан толық тексерілді. Сараптамалардың барлығы алынып, зерттеуге жіберілді.
598 рет оқылды
