Өңірлік индустрияландыру картасы аясында Келес ауданында жыл басынан бері 9 жоба іске асырылды. Жобалардың жалпы құны - 592,1 млн теңгені құрайды. Нәтижесінде 100-ден астам жұмыс орны ашылды.
Сондай-ақ, алдағы жылы 3 ірі жобаны іске асырылу көзделуде. Олардың жалпы құны - 4 млрд. 100 млн. теңге. Аталған жобалар жүзеге асса, 90 адам жұмыспен қамтылмақ. Бұл туралы Түркістан облысының Өңірлік коммуникациялар қызметінде өткен брифингте Келес ауданының әкімі Ақментай Есбаев мәлім етті.
Алдағы жылы ауданда жүзеге асатын жобалар: құны 1 млрд. теңгелік “Оңтүстік Агропродакшн” ЖШС 310 гектар аумаққа жерге грек жаңғақ егу, “Бес Қара” ЖШС 400 га қарқынды бау егу (құны 3 млрд. теңге), “Көшім” ШҚ-ның балық өсіру және балық етін өңдеу (құны 100 млн. теңге) жобасы.
«Кәсіпкерлікті дамыту аясында белсенді шағын және орта бизнес бойынша өңірде белсенді кәсіпкерлік субъектілер саны 7279 бірлікті құрап, тиісті кезеңмен салыстырғанда 1,2 пайызға артқан. Салада шығарылған өнімдер мен көрсетілген қызмет көлемі 23,2 млрд. теңгені құрап, 4,1 пайызға және бюджетке тиесілі төленген салық төлемдері 5,3 пайызға артып, 327 млн. теңгені құрады. Сонымен қатар, негізгі капиталға бағытталған инвестиция көлемі 3020,5 млн. теңге құрап отыр», - деді Ақментай Үсенұлы.
Ауыл шаруашылығы саласында жылыжай жыл басынан бері 10,6 гектар аумаққа салынған болса, тамшылатып суару әдісі 287 гектар жерге енгізілген.
Құрылыс саласында ағымдағы жылы жалпы құны 15 млрд. 579 млн. теңгені құрайтын 24 нысанның құрылысы жүргізіліп жатыр. 17 нысан 2019 жылға өтпелі.
1204 рет оқылды
