ҚР Бәсекелестікті қорғау және дамыту агенттігі төрағасының орынбасары Марат Омаров Қазақстанда жылу энергиясына тарифтердің өсуі мүмкіндігіне қатысты сұраққа жауап берді, деп хабарлайды ҚазАқпарат.
«Жылу энергетикасы табиғи монополия саласы болып саналады, бәсекелестік нарығы емес. Бұл тұрғыда бізде тарифтік реттеу бар. Заңнамада тарифтік реттеудің негізгі мақсаты ескерілген, яғни тұтынушы мен жылу энергиясы өндірушілері мүдделері арасындағы теңгерімді айқындау қарастырылған», - деді М. Омаров Орталық коммуникациялар қызметінде.
Оның айтуынша, елімізде тарифті қалыптастырудағы қадамдар шығын тетігі бойынша жүргізіледі, яғни тариф табиғи монополиялар субъектілері көрсететін шығынның негізінде қалыптасады. Осы орайда ол бұл қадамды ынталандырушы тарифті қалыптастыруға ауыстыру ұсынысы жасалғанын еске салды.
Сонымен қатар агенттік өкіліне тілшілер жылу энергиясының қымбаттауы мүмкіндігіне қатысты сұрақ қойды.
«Жалпы, бізде баға реттелетін нарықтарда ғана емес, сонымен қатар бәсекелестік нарықтарда да көтеріліп жатыр. Барлық жерде шикізатқа, электр энергиясына, энергия ресурстарына шығындардың артуына байланысты осы процесті байқауға болады. Сондықтан бұл процесс тарифтің өсуіне қарай жылжып келеді. Алайда шығынды тәсілді сақтау немесе ынталандырушы әдістемені енгізу тікелей тарифтің өсуіне ықпал етпейді. Бұл тұрғыда осы нарықтарда тарифті қалыптастыру тетіктеріне қатысты болып тұр», - деді Марат Омаров.
602 рет оқылды
