Қарашада Қазақстанда әлеуметтік маңызы бар азық-түлік тауарларының қымбаттауы бәсеңдеді. Айдың бірінші аптасында жалпы азық-түлік қоржыны бойынша баға өсуі байқалмады, бірақ 19 тауардың 8-і бойынша баға 0,4 пайызға, ал тағы бес тауардың бағасы 1-2 пайызға өсті, - деп хабарлайды Tengrinews.kz тілшісі Energyprom.kz сайтына сілтеме жасап.
Сарапшылар мәліметінше, жалпы жыл басынан бері азық-түлік қоржынындағы өсім 10,4 пайыз болды.
Қазанда Қазақстанда инфляция деңгейі 8,9 пайызға жетіп, оған ең көп әсер еткен азық-түлік өнімдері болды. Азық-түлік тауарлары бір жылда 11,3 пайызға (жыл басынан бері 8,2 пайызға) қымбаттады.
Биыл азық-түліктің қымбаттауы жалпы әлемдік үрдіс болды. Еуроодақта биыл қазанда азық-түлік бағасы 2 пайызға, АҚШ-та 5,3 пайызға қымбаттады. Біріккен Ұлттар Ұйымының Азық-түлік және ауыл шаруашылығы ұйымының (ФАО) азық-түлік бағасының индексі қазанда 133,2 тармақ болды – қыркүйектегі көрсеткіштен 3,9 тармаққа (3 пайыз) және 2020 жылғы қазандағы көрсеткіштен 31,8 тармаққа (31,3 пайыз) жоғары болды. Кейінгі үш айда бұл көрсеткіш 2011 жылдың маусымынан бергі ең жоғары деңгейге жетті.
Қазақстанда бидай бағасы бір жылда 16,5 пайызға, ұн-жарма және крахмал өнімдерін өнеркәсіптік өндірушілер бағасы 16 пайызға өсті.
Әлеуметтік маңызы бар азық-түлік тауарларының тізімінде күнбағыс майы, көкөністер, қант және қарақұмық жармасы қымбаттады. Бұл санаттарда агроөнеркәсіптік кешен өнімдерін өндірушілер, сондай-ақ өңдеу сегментін өндірушілер бағасының күрт өсуі байқалады. Мысалы, күнбағыс майы бөлшек саудада жылына 56,2 пайызға қымбаттады. Бұл ретте ауыл шаруашылығы тауарын өндірушілердегі күнбағыс тұқымдары 40,6 пайызға қымбаттады, ал өнеркәсіптік өндірушілер өз өнімдері бағасын бірден 59,3 пайызға көтерді.
Сонымен қатар, шикі сүт фермерлерде 10,2 пайызға қымбаттады, сүт пен ірімшікті өңдеу сегментінде бағалар тек 4,6 пайызға өсті, нәтижесінде бөлшек саудадағы сүт бағасы тек 5-8 пайызға өсті.
Егер өнімдер Қазақстанда өндірілмесе, негізінен экспорт есебінен келетін жағдай басқаша қалыптасады. Қант өндірушілер өз өнімі құнын 14 пайызға арттырды, ал бөлшек саудада қант 25 пайызға қымбаттады. Сонымен қатар, биылғы үш тоқсанының қорытындысы бойынша жергілікті қант зауыттары сектордағы сұраныстың тек 44,5 пайызын жаба алды.
827 рет оқылды
