Діни ғұрып бойынша ғана некесін қиып, ресми түрде тіркеуге тұрмаған қазақстандықтар жазаланатын болады. Осы күзде Мәжіліске қаралымға берілетін заң жобасына осындай нормалар енгізіледі, - деп хабарлайды kaz.tengrinews.kz тілшісі.
Дін істері және азаматтық қоғам министрі Нұрлан Ермекбаев үкімет отырысының үзілісінде діни қызмет және діни бірлестіктер туралы заң жобасы жыл соңына дейін қабылдануы керек екенін мәлімдеді. Заңдағы нормалардың бірі некеге тұруға қатысты.
"Неке қию институтын реттеу. (...) Қазір діни ғұрып бойынша неке қиып, АХАЖ-ға тіркеуге тұрмайтындар бар. Бұл заң жүзінде дұрыс емес. Мұның жолын кесу үшін заңға толықтыру енгізіледі. Яғни ресми түрде тіркеуге тұрмағандардың жазасы қатаңдатылуы мүмкін", - деді министр журналистерге.
Министрдің сөзінше, заң жобасында діни білім мен киімге қатысты өзге де мәселелер қарастырылған.
"Кәмелетке толмағандарды дінге тартуды реттеу. (...) Деструктив идеологиялық және діни ағымдардың сыртқы көрінісіне қатысты. Ол фашистік свастика болуы мүмкін, қандай да бір нәсілдік, ұлттық ұйымдардың белгісіне қатысты", - дейді министр.
3630 рет оқылды
