Мәжілістің жалпы отырысында «Қазақстан Республикасының Үкіметі мен Қырғыз Республикасының Үкіметі арасындағы өтеусіз әскери-техникалық көмек көрсету туралы келісімді ратификациялау туралы» заң жобасы мақұлданды, деп хабарлайды ҚазАқпарат.
Қазақстан Үкіметі мен Қырғызстан Үкіметі арасындағы өтеусіз әскери-техникалық көмек көрсету туралы келісім 2021 жылғы 2 наурызда Нұр-Сұлтан қаласында жасалған.
«Келісім қырғыз тарапына әскери мүлікті, атап айтқанда, оқ-дәрілер мен арнайы жабдықты бір рет беруді көздейді. Қазақстан тарапы әскери мүлікті Қырғыз Республикасының Қой-Таш елді мекеніне дейін автомобиль көлігімен жеткізуді қамтамасыз етіп, оған байланысты барлық шығысты өзі көтереді», - деді ҚР Қорғаныс министрінің орынбасары Руслан Шпекбаев.
Оның айтуынша, қырғыз жағы Қазақстаннан алған әскери мүлікті, оны пайдалану құқығын үшінші тарапқа бермейді.
«Әскери мүлікті Қырғызстанға беру Қазақстанның жауынгерлік әзірлігі мен қорғаныс қабілетіне ықпал етпейтінін атап өту қажет», - деді Шпекбаев.
765 рет оқылды
