Соңғы төрт жыл ішінде Қазақстанның ірі мыс өндірушісі Нұрсұлтан Назарбаев құрған коммерциялық емес ұйымдар үшін демеуші рөлін атқарып келген. Осы кезеңде компания экс-президенттің қорларына 79,4 млрд теңге аударған, деп хабарлайды Ulysmedia.kz Protenge Telegram-каналына сілтеме жасап.
"Қазақмыс" Назарбаевтың қорларына ең көп соманы 2018 жылы аударған – 32 млрд теңге. 2019 жылы демеушілік көмек 12 млрд теңгеге дейін қысқарыпты, бірақ 2020 жылы қайтадан 29,2 млрд теңгеге дейін өсті. 2021 жылы компания экс-президенттің қорларына 6,2 млрд теңге аударған. Барлық жағдайларда бұл шығындарға "әлеуметтік саланы қолдау" деген айдар тағылған.
2018 жылдан 2020 жылға дейін "Қазақмыс" қаражаты жалғыз алушыға – "Қазақстан Республикасының Тұңғыш Президенті - Елбасы Қоры" ЖҚ аударылған. Алайда, 2021 жылы аталмыш қор өз жұмысын тоқтатқаннан кейін, оның орнына басқа да реципиенттер пайда болған. Бірақ олар туралы ақпарат "Қазақстан Республикасы Тұңғыш Президентінің қорлары" деген атаумен жасырылған.
Еліміздегі тәуелсіз ақпарат құралдарының зерттеуінше, Нұрсұлтан Назарбаев төрт қордың құрылтайшысы: "Назарбаев қоры", "Нұрсұлтан Назарбаев қоры", "Демеу қоры", "Елбасы қоры". Қайырымдылықтан бөлек, олар миллиардтаған долларлық активтерді басқарумен айналысады. Ресми түрде олар Назарбаевқа тиесілі емес, бірақ қорлардың негізін қалаушы ретінде олар оның бақылауында.
"Қазақмыс" тобының соңғы бенефициарлары Владимир Ким (70%) және Эдуард Огай (30%). Владимир Ким Forbes рейтингінде $5 млрд жағдаймен "Қазақстанның 50 ең бай бизнесмені – 2022" рейтингінде бірінші орын алады, Эдуард Огай – $583 млн жағдаймен он төртінші орын.
1276 рет оқылды
_140_110.jpg)
