Заңды кәсіпкерлік қызметке кедергі келтіргені үшін жауапкершілікке тартудың қылмыстық бабы іс жүзінде жұмыс істемей тұр. Бұл туралы Қазақстан Республикасы кәсіпкерлерінің құқықтарын қорғау жөніндегі уәкілі Рустам Жүрсінов мәлім етті, деп хабарлайды ҚазАқпарат.
«Бизнеске ауқымды шығын келтіргені үшін мемлекеттік қызметшілер өздерінің қателіктеріне іс жүзінде ешқандай жауапкершілікті алмайды. Статистикаға қарағанда, қылмыстық әрі әкімшілік ықпал ету шаралары өте сирек қолданылады», - деді Р. Жүрсінов Қазақстанда шағын және орта кәсіпкерлікті дамыту саласындағы мемлекеттік саясатты және құқықтық реттеуді жетілдіру тақырыбындағы Парламенттік тыңдауда.
Оның айтуынша, заңды кәсіпкерлік қызметке кедергі жасағаны үшін қылмыстық жауапкершілік (365-бап) ескерілген.
«Тәжірибе жүзінде ол жұмыс істемей тұр. Соңғы 3 жылда 1 адам сотталған», - деп нақтылады уәкіл.
Таратылған мәліметтерге қарағанда, 2016 жылы 365-бап бойынша жеті құқық бұзушылық бойынша қылмыстық іс қарауда болған, бесеуі сотқа жолданып, 3 адам сотталды. 2017 жылы бес құқық бұзушылық бойынша іс қаралып, бір адам сотты болды. 2018 жылы осындай статистика тіркелмесе, 2019 жылы үш құқық бұзушылыққа қатысты іс қаралып, сотқа біреуі жолданды.
1181 рет оқылды
_140_110.jpg)
