Қапшағай су қоймасында балық шабақтарының қырылуына байланысты Қылмыстық кодекстің 328-бабының белгілері бойынша іс қозғалды, деп хабарлайды "Ұлт ақпарат" Экология, геология және табиғи ресурстар министрлігінің баспасөз қызметіне сілтеме жасап.
"2 қарашада «Instagram» желісінде балық шабақтарының қырылуы тіркелген бейнежазба орналастырылды.
Экология және полиция департаменттерінің, Балқаш-Алакөл облысаралық бассейндік балық шаруашылығы инспекциясының және жергілікті атқарушы органның, Қонаев қаласының Төтенше жағдайлар басқармасының, Қонаев қаласы бойынша санитарлық-эпидемиологиялық бақылау басқармасының, «Қазгидромет» РМК, «Балық шаруашылығының ғылыми-өндірістік орталығы» ЖШС қызметкерлерінен құралған жұмыс тобы балық шабақтарының қырылуы орын алған жерге шықты.
Бүгінгі таңда Қонаев қаласы бойынша санитарлық-эпидемиологиялық бақылау басқармасы, Алматы облысы бойынша экология департаменті, «Балық шаруашылығының ғылыми-өндірістік орталығы» ЖШС, «Қазгидромет» РМК балық шабақтарының қырылу себептерін анықтау үшін тиісті зерттеулер жүргізіп жатыр. Гидрохимиялық талдау нәтижелері 3 күннен кейін, токсикологиялық және ихтиопатологиялық талдау нәтижелері 1 айдан кейін белгілі болады" - делінген хабарламада.
Ведомство мәліметінше, 2-3 қарашада Лев горы ауданында Қапшағай су қоймасының 11 балық шаруашылығы учаскесінде Балқаш-Алакөл облысаралық балық шаруашылығы бассейндік инспекциясы (бұдан әрі - инспекция) және «Айна Су» ЖШС қорықшылық қызметі қызметкерлерінің күшімен санитарлық нормаларды сақтай отырып, одан әрі жоюды жүргізу арқылы қырылған балық шабақтарын жинау жүргізілген. Қырылған балық шабақтарының жалпы салмағы 1232 кг құрады (қаракөз балығының сеголеткалары).
Бұдан басқа, көрсетілген факт бойынша Қылмыстық кодекстің 328-бабының белгілері бойынша (жер үсті немесе жер асты суларының, мұздықтардың, ауыз сумен жабдықтау көздерінің ластануы, бітелуі, сарқылуы не егер бұл елеулі экологиялық залал келтіруге немесе адам денсаулығына зиян келтіруге әкеп соқтырса немесе олардың табиғи қасиеттерінің өзге де өзгеруі) қылмыстық іс қозғалған. Қазіргі уақытта балық ресурстарына келтірілген залал есебі жүргізіліп жатыр.
"Сондай-ақ, Инспекцияға барлық құзыретті және мүдделі органдар енгізілген балық шабақтарының қырылу себептерін анықтау бойынша Біріккен штаб құру жөнінде тапсырма берілді. Су қоймасы мен оның жағалау белдеуінің акваторияларына мониторинг жүргізу жалғасып жатыр" - делінген министрлік хабарламасында.
1067 рет оқылды
