Фото: Tengrinews.kz
Қаңтар оқиғасына қатысты Ұлттық қауіпсіздік комитетінің 11 қызметкері қылмыстық жауапқа тартылып жатыр. Бұл туралы Мәжілістің жалпы отырысында ҚР Ұлттық қауіпсіздік комитеті төрағасының орынбасары Марат Қалқабаев мәлім етті, деп хабарлайды ҚазАқпарат.
«Қазіргі кезде Ұлттық қауіпсіздік комитетінде 11 қызметкер қылмыстық жауапкершілікке тартылып жатыр. Кейбір істер бойынша тергеу аяқталды, кінәлілер қылмыстық жауапкершілікке тартылды. Бұл (қаңтар оқиғасы бойынша) қылмыстық қудалауға байланысты», - деді Қалқабаев депутаттардың сұрағына жауап бере отырып.
Осы орайда спикер қаңтар оқиғасынан кейін комитет құрамында тиісті тексеру жүргізілгенін айтты.
«Сонымен қатар, қаңтар оқиғасынан кейін бірден Ұлттық қауіпсіздік комитеті ауқымды қызметтік тексеріс жүргізді. Осы орайда бұйрық талаптары мен қызметті атқару тәртібіне, оның ішінде лауазымды тұлғалардың жауапкершілігіне қатысты елеулі өзгерістер енгізілді. Мұнымен қоса, бүгін талқыланып жатқан заң жобасында әр қызметкер іс-әрекетінің белгілі бір алгоритмі мен патриотизмді тәрбиелеуге бағытталған тиісті түзетулер көзделген», - деді ҰҚК өкілі.
Бұдан бұрын хабарланғандай, бүгін Мәжілістің жалпы отырысында «Қазақстан Республикасының кейбір заңнамалық актілеріне ұлттық қауіпсіздікті қамтамасыз ету және Қазақстан Республикасының арнаулы мемлекеттік органдарындағы қызмет мәселелері бойынша өзгерістер мен толықтырулар енгізу туралы» заң жобасы бірінші оқылымда мақұлданды.
622 рет оқылды
