20 сәу, 2022 сағат 19:20

Гүлмира Сатыбалдыға қатысты тағы бір іс қозғалды

Гүлмира Сатыбалды Универсиада-2017 нысандарын жөндеуге бағытталған қаражатты жымқырды деген күдікке ілінді, - деп хабарлайды "Ұлт ақпарат" Антикор баспасөз қызметіне сілтеме жасап.

"Алматы қаласы бойынша Сыбайлас жемқорлыққа қарсы қызметі "Алматы қаласы Энергетика және коммуналдық шаруашылық басқармасы" КММ лауазымды тұлғалары мен "Ария-Жаңа Астана" ЖШС компания басшылығына қатысты, оның ішінде Гүлмира Сатыбалдыға қатысты 2019 жылы "Алматы қаласындағы 2017 жылғы Универсиада" нысандары үшін құрылыс-монтаж жұмыстарын нақты орындалмаған міндеттер үшін төленген аса ірі мөлшерде бюджет қаражатын жымқыру фактісі бойынша сотқа дейінгі тергеу жүргізіліп жатыр", - делінген хабарламада.

Осыған ұқсас аса ірі көлемдегі бюджет қаражатын жымқыру деректері бойынша Мемлекеттік органдардың лауазымды тұлғалары мен "Ария-Жаңа Астана" ЖШС басшылығының қатысуымен басқа өңірлерде соталды тергеп-тексерулер жүріп жатыр.

Өзге ақпарат тергеу мүддесінде жария етілмейді.

Айта кетейік, Гүлмира Сатыбалды – Нұрсұлтан Назарбаевтың немере інісі Қайрат Сатыбалдының бұрынғы әйелі.

Бұған дейін Шымкент қаласы бойынша сыбайлас жемқорлыққа қарсы қызметінің Гүлмира Сатыбалдыға қатысты сотқа дейінгі тергеу жүргізіп жатқаны хабарланды.

Іс 2021 жылы нақты орындалмаған құрылыс-монтаждау жұмыстары үшін аса ірі мөлшерде (747 миллион теңге) бюджет қаражатын жымқыру фактісі бойынша басталған.

Ал 15 наурызда Тұңғыш Президенттің немере інісі Қайрат Сатыбалды екі айға қамауға алынды.

Ол "Қазақтелеком" АҚ-ның қаражатын аса ірі көлемде жымқырғаны үшін айыпталып отыр. Сондай-ақ мемлекет қауіпсіздігіне нұқсан келтіретін басқа да қылмыстарға қатысы бар-жоғы тексеріліп жатыр.