Жыл басынан бері 2,5 мыңға жуық есірткі қылмысы анықталды. Бұл туралы Ішкі істер министрлігі Есірткі қылмысына қарсы іс-қимыл департаментінің басқарма басшысы Бақытжан Әмірханов айтты, деп хабарлайды ҚазАқпарат.
«Есірткі мен нашақорлық қоғамды қатты алаңдатып отыр. Еліміздегі ахуалға 3 негізгі фактор әсер етеді. Біріншіден, Орталық Азия, Қазақстан, Ресей мемлекеттері арқылы өтіп, әрі қарай Еуропаға апаратын «Солтүстік бағыт» бойынша ауған героинінің трафигі бар. Екіншіден, синтетикалық есірткілердің кең таралу қаупі бар. Үшіншіден, еліміздің оңтүстік өңірлерінде (Шу алқабы және Қызылорда облысы) каннабистен жасалатын есірткінің түрлері бар», - деді Әмірханов Орталық коммуникациялар қызметінде.
Оның айтуынша, жыл басынан бері барлық құқық қорғау және арнайы органдар бірлесіп 2,5 мыңға (2168-ін ІІМ анықтады) жуық есірткі қылмысын анықтады. Оның 60 пайызы (1,5 мың) есірткі сату қылмысына қатысты.
«Жалпы, 12,7 тонна есірткі тәркіленді. Осы орайда есірткінін негізгі түрлеріне тоқталсақ, героин – 33 келі, апиын – 68 келі, синтетика – 507 келі, гашиш – 705 келі, марихуанна 4 тоннадан астам болса, қалғаны есірткінің басқа да түрлері», - деді басқарма басшысы.
Оның сөзіне қарағанда, 4 ұйымдасқан қылмыстық топтың әрекеті әшкере болды. Соның ішінде ұйымдасқан қылмыстық топтын 32 белсенді мүшесі құрықталды. Олар 13 аса ауыр есірткі қылмысын жасағаны үшін айыпталды.
636 рет оқылды
