Ел өңірлерінің Астананың 20 жылдық мерейтойына дайындап жатқан тартулары белгілі болды, деп хабарлайды "Ұлт Ақпарат" Елорда Инфо сайтына сілтеме жасап.
Елорда әкімі Әсет Исекешевтің халықпен есептік кездесуінде белгілі болғандай, бас қаланың биылғы мерейтойына аймақтар бір-бір әлеуметтік маңызға ие нысандарды салып бермек.
Атап айтқанда Ақтөбе обылыс «Бейбітшілік қақпасы» композициясын, Алматы қаласы 240 орындық балабақша салуды, Алматы облысы Арай саябағы базасында спорттық-сауықтыру қалалық паркін, ал Атырау облысы Есіл өзені арқылы өтетін велосипедшілер мен жаяу жүргіншілерге арналған көпір салуды көздеп отыр.
Шығыс қазақстан облысы биыл шілде айында ашылатын Ботаникалық саябаққа жарықты-музыкалық фонтан, Қызылорда облысы «Космос» тақырыбына ашық алаңы бар гүлзар мен экспозиция тартуды жөн санаған.
Биыл елордада «Қазақ еліне мың алғыс!» монументі мен жаяу жүргіншілер бульвары пайда болады. Бұл - Астанаға Қарағанды облысының дайындап отырған сыйы.
Батыс Қазақстан облысы Жеңіс пен Бөгенбай батыр даңғылдарының қиылысында гүлзар салмақ, ал Маңғыстау облысы Достық үйін қайта жөндеу құрылыстарын жүргізеді, сондай-ақ ОҚО, СҚО, Павлодар, Қостанай, Ақмола және Жамбыл облыстары есебінен қалалық саябақтан бастап Ильинка кентіне дейін қашықтығы 56 шақырым веложол салынады.
Әсет Исекешевтің айтуынша, Астананың 20 жылдық мерейтойында елордада 645-тен астам мәдени-бұқаралық шара өткізу жоспарланып отыр.
2594 рет оқылды
