2020 жылдың күзінен бастап елорда тұрғындарына газ беріле бастайды. Бұл туралы бүгін Үкімет үйіндегі баспасөз мәслихатында ҚР Энергетика вице-министрі Мұрат Жүребеков айтты, деп хабарлайды ҚазАқпарат.
«Сарыарқа» магистральды газ құбырына қосылу үшін Нұр-Сұлтан қаласының, Қарағанды мен Ақмола облыстарының әкімдіктері газ тарату желілерін салуы тиіс. Нұр-Сұлтан қаласында газ тарату желісін салу 2025 жылға дейінгі құрылыс мерзімімен үш кезеңге бөлінген. Қала әкімдігі 9 іске қосу кешені бар 1-кезеңнің жобалық-сметалық құжаттамасына мемлекеттік сараптаманың оң қорытындысын алды», - деді вице-министр.
Оның айтуынша, бірінші кезеңді жүзеге асыру үшін биыл республикалық бюджеттен 2,2 млрд теңге бөлінген. Аталған қаражаттың 550 млн теңгесі 1-інші және 2-іске қосу кешеніне, 1,7 млрд теңге 3-інші және 6-іске қосу кешендерін салуға жұмсалады.
«Барлық 9 іске қосу кешені бойынша мердігер ұйымдар анықталып, құрылыс-монтаждау жұмыстары басталды. 1-інші, 2-іске қосу кешендері Жылу электр стансасына желі тартуды көздейді. Қазіргі уақытта 4 шақырым немесе 15,4 пайыз құбыр төселді. ЖЭС-1, 3-ке арналған газды реттеу бекетінің і етті барлық құрал-жабдықтар мен 100 пайыз құбыр өнімдерін жеткізу күтіледі. 3-тен бастап 6-шы іске қосу кешендері Көктал-1, 2 тұрғын үй алаптарына газ тарату желілерін қамтиды. Бұл кешендер аясында 14 шақырым немесе 78 пайыз құбыр жеткізілді. Көктал шағын ауданында 4 газ реттеу бекетінің іргетасын дайындау жұмыстары аяқталды. Жылдың соңына дейін 4 газ реттеу бекетін және 100 пайыз құбыр өнімдерін жеткізу күтіледі», - деді вице-министр.
Мұрат Жүребеков 7-ден бастап 9-шы іске қосу кешендері Оңтүстік-Шығыс, Железнодорожный тұрғын үй алаптарына газ жеткізуді көздейтіндігін айтты. Бұл бағытта осы жылдың соңына дейін 9 шақырым құбыр өнімдері жеткізілмек.
«Бірінші кезең мен 9-іске қосу кешені құрылысының толықтай аяқталуы келесі жылдың жылу беру маусымына, яғни 2020 жылдың күзіне жоспарланған», - деді ол.
1379 рет оқылды_140_110.jpg)
_80_80.jpg)
