© Photo: ҚР Парламент Сенатының баспасөз қызметі
Экс-президент Нұрсұлтан Назарбаевтың кеңсесінде жұмыс істейтін адам саны қысқартылды, бюджеті де азайтылады. Бұл туралы Cенат спикері Мәулен Әшімбаев мәлімдеді, деп хабарлайды Sputnik Қазақстан.
Бүгін Cенат отырысынан кейін журналистер спикерден экс-президенттің кеңсесі туралы сұрады.
"Менің білуімше, онда істейтін адамдардың санын күрт қысқарған. Қазір нақты санын айта алмаймын. Бірақ бұрынғыдай біраз адам істеп жатқан жоқ. Қазір үлкен функциялары да жоқ. Соған байланысты бюджетті қараған кезде біз қаржы мәселесін де қарайтын шығармыз", - деді Әшімбаев.
Спикердің ойынша, Назарбаевтың кеңсесі батыстың үлгісімен қалуы мүмкін.
"Мысалы, АҚШ-ты алып қарасақ, ол жақта экс-президенттердің кітапханалары бар, өздерінің музейлері болады, өздерінің ішкі аппараты болады. Бұл жалпы дамыған мемлекеттерде бар үрдіс. Егер ол президент біраз еңбек етсе, өзінің кітаптары, қағаздары болады. Бір-екі көмекшісі болуы керек шығар. Сондықтан біз өзіміз бір нәрсе тауып отырған жоқпыз. Бұл батыс мемлекеттерінде бар үрдіс. Осыдан біз үйренуіміз керек. Бірақ бұрынғыдай кеңсе жоқ", - деп атап көрсетті спикер.
видео: Sputnik Қазақстан
795 рет оқылды
