Екібастұзда төтенше жағдай режимі алынып тасталды. Бұл туралы қала әкімі Аян Бейсекин Instagram-парақшасында жариялады.
"Қалада 28 қарашада енгізілген төтенше жағдай режимі алынып тасталды", - делінген хабарламада.
Еске салайық, 27 қарашада түнде, сағат 01:20 шамасында, Екібастұз ЖЭО-да қазандық істен шығып, он минуттан кейін тағы үшеуі тоқтаған болатын. Сол уақыттан бері қала тұрғындары жылу жоқ екенін айтып, шағымдана бастаған.
Қалада төтенше жағдай жарияланған еді. Төтенше жағдай жөндеу-қалпына келтіру жұмыстары аяқталғанға дейін күшінде болатыны айтылды. Павлодар облысының прокуратурасы Екібастұздағы төтенше жағдай бойынша қылмыстық іс қозғады.
Төртінші күні ҚР премьер-министрі Әлихан Смайылов жұмыс сапарымен Екібастұз қаласына барды. Ал 1 желтоқсанда Президент Қасым-Жомарт Тоқаев Әбілқайыр Сқақовты Павлодар облысының әкімі лауазымынан босатты. Сқақовтың орнына Олег Крук Павлодар облысы әкімінің міндетін уақытша атқарушы болып тағайындалды.
Ал, кеше бұл орынға Асайын Байханов келді.
1228 рет оқылды
