2020 жылы еліміздің көмір өндіруші компаниялары 109,2 млн тонна көмір шығарды. Бұл туралы ҚР Индустрия және инфрақұрылымдық даму министрлігінен мәлім болды, деп хабарлайды «Ұлт ақпарат».
«Энергия өндіруші кәсіпорындарға 58,8 млн тонна көмір тиелді, бұл 2019 жылмен салыстырғанда 2,6 пайызға артық. Өнеркәсіп кәсіпорындарына 5,6 млн тонна көмір жөнелтілді, сондай-ақ коммуналдық-тұрмыстық қажеттіліктерге және халыққа 10,6 млн тонна көмір тиелді. Көмір экспорты шамамен 29,3 млн тоннаны құрады», - делінген ведомство мәліметінде.
Естеріңізге сала кетейік, 2020-2021 жылдардағы кезеңде коммуналдық-тұрмыстық қажеттіліктер және халық үшін көмір өнімі қажеттілігінің қалыптасқан жоспарына сәйкес, тұтыну көлемі шамамен 10 млн тоннаны құрады. Оның ішінде коммуналдық-тұрмыстық секторға шамамен 2,8 млн тонна, тұрғындарға 7,2 млн тоннасы тиесілі. 2021 жылғы 15 қаңтардағы жағдай бойынша жалпы жоспарға қатысты көмір қорымен қамтамасыз ету мынадай көрсеткіштерді құрайды:
-коммуналдық-тұрмыстық сектор - 93,4%; -тұрғындар - 99,5%. Ақтөбе, Алматы, Шығыс Қазақстан, Жамбыл, Батыс Қазақстан, Қарағанды, Қостанай, Қызылорда, Павлодар облыстарының және Алматы мен Шымкент қалаларының әкімдіктері коммуналдық-тұрмыстық сектор үшін көмір жеткізуді толық қамтамасыз етті.
«Сонымен қатар, Батыс Қазақстан, Қызылорда, Ақмола, Шығыс Қазақстан, Қостанай, Жамбыл, Павлодар облыстарының, Шымкент, Алматы және Нұр-Сұлтан қалаларының әкімдіктері халыққа көмір жеткізуді толық қамтамасыз етті», - деп аталып өткен министрлік хабарламасында.
965 рет оқылды
_140_110.jpg)
