Бурабай аудандық орталықтандырылған кітапханалар жүйесінде "Рухани жаңғыру" мемлекеттік бағдарламасын жүзеге асыру мақсатында, "Автор және оқырман" жобасы аясында Бұланды ауданынан келген, ақын, журналист Жайнарбек Зандыбайұлымен кездесу кеші өтті.
Кездесу кеші барысында автор өз шығармашылығын таныстырып, рухты өлеңдерін оқып, алғашқы қалам ұстаған жылдарынан бастап бүгінгі шығармашылық жолымен ой бөлісті. Ақынды қолдап келген кешіміздің құрметті қонақтары Бұланды мәдениет үйінің директоры, автордың өмірде де, өнерде де досы Сәрсекеев Ернұр Сағатұлы гитарамен әсем ән шашу етсе, Бұланды аудандық мәдениет үйінің директорының орынбасары Кенжеғалиев Әлішер Жәнібекұлы автордың "Ойнамаңдар" өлеңін оқыды. Автордың шәкірттері жас ақын Тілек Серік ұстазының "Рухым қайда?" өлеңін оқыса, Бергенбек Азатбайұлы арнау орындап, керемет кештің шырайын келтірді.
Рухани кеш өте әсерлі, тәрбиелік маңызы зор болды. Оқырмандар сұрақтарын қойып,автор мен оқырман арасында ерекше жылулық, өзара байланыс орнады. Жайнарбек Зандыбай кеш бойы әр тақырыпта өлеңдерін оқып, жастарға ой салар ұстамды сөздерін жеткізді. Кеш шынайы, еркін форматта өткендіктен керемет әсер қалдырды.
Автордың бірнеше өлеңдерін жоғары педагогикалық колледжінің студенттері Ақмарал Тілеген, Алимжанов Орынбек, аудандық кітапхананың қызметкері Махаббат Оразалина ерекше нақышта жеткізді.
Кеш соңында авторға кітапхана директоры жылы лебізін білдіріп, алғыс хатпен кітаптар сыйға тартты және "Цифрлық Қазақстан" жобасы бойынша автордың шығармашылығын сандық көшірмеге түсіру мақсатында авторлық келісім-шартқа қол қойылды.
Сондай-ақ, "Өлең-өмір айнасы" кітап көрмесі оқырмандар назарына ұсынылды. Осындай кештің берер тағылымы мол екендігі сөзсіз.
1483 рет оқылды_140_110.jpg)
_80_80.jpg)
