Ақтөбе облысының әкімі Бердібек Сапарбаев 5 маусым күні қарулы шабуыл жасалған қару-жарақ дүкендерін аралады. Құқық қорғау органдарымен бірлесе өткен тексеру кезінде «Паллада» дүкеніндегі қару сақтау заңдылықтарының толық орындалмағаны анықталды. Кейін өңір басшысы қауіпсіздік талабы сақталмаса, «Паллада» қару-жарақ дүкенін жабу қажет екенін айтты, деп хабарлайды Baq.kz тілшісі.
5 маусым күні түс мезгілінде қарулы топ алдымен қала орталығындағы «Паллада» қару-жарақ дүкеніне шабуыл жасаған болатын. Дәл осы жерде «Күзет» қызметкері Миржан Тәжібаев, зейнеткер Николай Онищенко, сатушы Андрей Максименко қаза болды. Тергеу кезінде белгілі болғаны, 18 қару мен ондаған оқ-дәріні лаңкестер еш қиындықсыз қолға түсірген. Оқиғадан соң «Паллада» дүкенінің иесі Артем Горлаев 1 жылға сотталып, ол жазасын қоныс колониясында өтеп жатыр.
Ақтөбе облысында тексеру жұмыстары әрі қарай жалғасуда. Облыс әкімі Бердібек Сапарбаев қаладағы «Пантера» және «Палллада» қару-жарақ дүкендеріне барып, қауіпсіздік жұмыстарын қарап шықты. «Пантера» дүкенінде қажетті бейнебақылау, дабыл түймесі, сатылымдағы суық қарулар мен қару-жарақтардың фотореал деп аталатын макеттері орналасқан. Кейін облыс әкімі «Паллада» дүкеніне барды. Мұнда қару сақтау талаптары толық орындалмай отыр.
«Егер сіздер 5 маусымға дейін қажетті қауіпсіздікті сақтағанда, жағдай бұлай болмас еді. Мәселен, «Пантера» дүкенінде қауіпсіздік ережелері сақталып отыр. Неге солардан қарамайсыздар? Бірнеше рет ескерту жасалды. Соны неге орындамайсыздар? «Пантера» дүкеніне барыңыз, қараңыз»,-деді облыс әкімі Бердібек Сапарбаев.
Айта кетейік, дүкендерде суық қарудың түпнұсқасы емес, фотореал тұруы тиіс. Екі қарудың бір-бірінен айырмасы болмайды. Сатып алушы, алдымен, макетін қарап, кейін кеңседен ІІД-нің рұқсат қағазын көрсету арқылы қаруды сатып алады. 5 маусым күні 3 адам қаза болған «Паллада» қару-жарақ дүкенін тексеру жұмысынан соң облыс әкімі Бердібек Сапарбаев дүкен иесі қауіпсіздік ережелерін сақтамаса жабуды, ал облыстық ІІД басшысы Махамбет Абисатовқа барлық ережелердің сақталуын қадағалауды тапсырды.
Алтынай САҒЫНДЫҚОВА
2516 рет оқылды
