Қазақстанда әуе көлігі инфрақұрылымын жаңғырту жұмыстары жоспарлы түрде жүргізіліп жатыр. Бұл туралы ҚР Индустрия және инфрақұрылымдық даму мнистрлігінен мәлім болды, деп хабарлайды "Ұлт ақпарат".
«Инфрақұрылымды дамытудың 2020-2025 жылдарға арналған «Нұрлы жол» мемлекеттік бағдарламасы аясында Өскемен қаласы әуежайының ұшу-қону жолағы қайта жаңартылуда. Жобада жолақтарды 300 метрге ұзарту және әуе кемелерінің қазіргі заманғы үлгілерін қабылдау үшін жарық-дыбыс жабдықтарын ауыстыру көзделген. Жеке инвестициялар есебінен Шымкент қаласы әуежайының жаңа терминалы салынып жатыр. Нәтижесінде, терминал алаңы 3,8 мыңнан 35 мың шаршы метрге дейін кеңейіп, өткізу қабілеті сағатына 150-ден 2000 жолаушыға дейін артады. Жаңа терминал халықаралық сапа және қауіпсіздік стандарттарына сәйкес келеді. Бұл мегаполис тұрғындары мен қонақтары үшін қолайлы жағдай жасайды», - делінген ведомство мәліметінде.
Батыс Қазақстан облысының әкімдігі жеке инвестицияларды тарта отырып, Орал қаласы әуежайының аэровокзал кешенін жаңғыртып жатыр. Терминал аумағы екі еседен астам ұлғайтылып, өткізу қабілеті сағатына 100-ден 200 жолаушыға дейін жеткізіледі.
Аталған жобалар бойынша құрылыс жұмыстарын 2021 жылдың соңында және келесі жылдың бірінші жартыжылдығына аяқтау жоспарланған.
Алакөл туристік орталығына көлікпен барып-қайтуды қолайлы ету мақсатында Үржардың ұшу-қону жолағын және аэровокзал ғимаратын реконструкциялау жұмыстарын биыл аяқтау жоспарлануда. Сондай-ақ, Үшарал қаласы әуежайының ұшу-қону жолағын, рөлдеу жолын және перронын реконструкциялау жұмыстары басталды.
Осы жобаларды іске асыру әуежайлардың жерүсті инфрақұрылымын жақсартып, қауіпсіздік және қызмет көрсету стандарттарын арттыруға ықпал етеді.
834 рет оқылды
