Алматыда белгісіз біреу Мәжіліс депутаты Бақытжан Базарбектің пәтерінің алдында тұрған бесік арбаны өртеп жіберді, деп хабарлайды "Ұлт ақпарат".
Депутат болған жағдайды әлеуметтік желідегі парақшасында баяндады.
"Менің отбасыма белгісіз біреулерден қоқан-лоққыға ұқсайтын әрекеттер басталды. Кішкентай балапанымның коляскасын пәтерімнің есігі алдында жағып жіберген. Осылай, Ескі Қазақстанның өкілдері өзінің бар-жоғын ескертіп, білдіртіп отырғандай сезінесің! Не болса да, тергеу қорытындысын күтейік", - деп жазды Базарбек.
Оның айтуынша, үйдің кіреберісінде тура пәтердің алдында бейнебақылау камерасы бар, сыртта да біреуі орнатылған.
"Сондықтан тергеушілер үшін ешқандай қиындық болмауы керек", - деп атап өтті депутат.
Айта кетері, депутат Базарбек Алматыдан бір манданттық округтен сайланды. Заңгер жер мәселесін жиі көтереді. Бұған дейін ол банктердің иелігіндегі 2 млн га жерді мемлекетке қайтаруды талап еткен.
576 рет оқылды
