Байқоңыр полицейлері адам өлімі болған атыс туралы әлеуметтік желідегі ақпаратқа пікір білдірді, - деп хабарлайды Tengrinews.kz агенттігі.
Instagram желісіндегі PravdaBaykonura-парақшасында Арбат пен Даманск аудандарының жастары пышақ және атыс қаруын қолданып, бір-бірімен төбелесіп жатқаны туралы жазба пайда болды.
"3 қыркүйекке қараған түні Арбат ауданы, Королев көшесі, 37-үйге жігіттер екі рет оқ атқан. Оқ сол үйден аулаға темекі шегуге шыққан адамға тиген. Ол алған жарақаттарынан сол жерде қаза болды", - деп жазылған басылымда.
Сондай-ақ, ресейлік полицейлердің қазақстандық полициямен бірлесе жұмыс істейтіні айтылған. Автордың айтуынша, оқиға орнына "Байқоңыр" кешеніндегі ішкі істер басқармасының бастығы Кузьминнің өзі келген.
"Атысқа қатысы бар деген екі адам ұсталды. Қала қоршауға алынды, қаланың бақылау-өткізу бекеттері жабылды. Барлық полиция қызметкеріне ескерту жасалды. Қала көшелерінде күдікті көліктердің барлығын ұстай бастады!" – деді пост авторы.
8 қыркүйекте өңірлік коммуникациялар қызметінде өткен брифингте Қызылорда облысы прокуратурасының басшысы, заң кеңесшісі Батырбек Нұрмағанбетов пен облыстық Полиция департаменті тергеу басқармасы бастығының орынбасары, полиция подполковнигі Асхат Мұхтарұлы ақпаратты жартылай растады және қайғылы оқиға 2 қыркүйекте Байқоңыр қаласында болғаны айтылған.
"Жедел ақпарат бойынша, төбелес "Арбат" пен "Даманск" топтарының басшылары арасындағы кикілжің салдарынан болған. 31 тамызда сағат 23:30 шамасында Байқоңыр қаласындағы көпқабатты тұрғын үйдің ауласында белгісіз азаматтар екі ер адамға бірнеше рет оқ атқан, соның салдарынан зардап шеккендер түрлі дене жарақаттарымен ауруханаға жеткізілген", - делінген хабарламада.
Осы факт бойынша, 1 қыркүйекте Ресей Федерациясы Ішкі істер министрлігінің "Байқоңыр" кешені бойынша департаменті РФ Қылмыстық кодексінің 111-бабы 3-бөлігі б тармағы ("Екі немесе одан да көп адамның денсаулығына қасақана ауыр зиян келтіру") бойынша тергеу амалдары жүргізіліп жатыр. Күдіктілер анықталмаған.
"Сонымен қатар, 3 қыркүйекке қараған түні сағат 00:30 шамасында Байқоңыр қаласындағы көпқабатты үйдің ауласында белгісіз біреулер көлікпен келе жатып, атыс қаруынан 33 жастағы ер адамды атып кеткен, салдарынан ол оқиға орнында қаза тапқан. Факт бойынша РФ Ішкі істер министрлігінің "Байқоңыр" кешені бойынша департаменті РФ Қылмыстық кодексінің 105-бабы 1-бөлігі ("Адам өлтіру") бойынша тергеу жүргізіп жатыр. Жедел-іздестіру іс-шараларының нәтижесінде аталған қылмысқа қатысы бар жергілікті тұрғын анықталды. 4 қыркүйекте ол Ресей Федерациясы ІІМ "Байқоңыр" кешені бойынша департаментінің уақытша ұстау изоляторына қамалды. Қылмыстық-процестік кодекстің 201-бабына сәйкес өзге мәлімет жария етуге жатпайды", - деді олар.
726 рет оқылды
