Батыс Қазақстан облысында апалы-сіңлілі 4 және 5 жасар екі қыз зорланған, - деп хабарлайды "Уральская неделя".
Күдікті ретінде Жаңа Өмір ауылында (бұрынғы Шаған совхозы) жәбірленушілермен көрші тұрған жас жігіт ұсталды.
Оқиға туралы 7 тамызда белгілі болған. Бұл жайында жәбірленушілердің бірі полицияда жұмыс істейтін әкесіне айтқан. Жаңа Өмір ауылы тұрғынының сөзінше, жәбірленушінің бірі Орал қаласында тұрады. Алайда оқиға болған күні ол туыстарына қонақтап келген екен.
Теректі полиция бөлімшесі күдіктінің уақытша тергеу изоляторында отырғанын растады.
"Күдікті ҚР Қылмыстық-процестік кодексінің 128-бабы бойынша ұсталды. Сот шешімі шыққанша уақытша тергеу изоляторында болады", - деді полиция бөлімшесінің кезекшісі.
Ұсталған адамның жақында әскерден келгені белгілі болды. Ол әскерге кетпес бұрын төбелеске қатысқаны үшін бірнеше рет полицияда болған. Тергеу іс-шараларын өткізгенге дейін күдікті уақытша ұстау изоляторына қамалды.
9 тамызда сот күдіктіге қатысты бұлтартпау шарасы жайлы шешім шығаруы керек. Қыз балалар қазір ауруханада. Олардың жағдайы әзірше белгісіз.
2793 рет оқылды
