Жамбыл облысы Жуалы орталық аудандық ауруханасының лауазымды тұлғаларына қатысты ақша иемдену фактісі бойынша сотқа дейінгі тергеу басталды. Бұл туралы ҚР Сыбайлас жемқорлыққа қарсы іс-қимыл агенттігі 1-ші департаментінің аға тергеушісі Қайсар Баржақсынов айтты, деп хабарлайды ҚазАқпарат.
«Жамбыл облыстық сыбайлас жемқорлыққа қарсы қызметі медицина қызметкерлерінің шағымы бойынша Жуалы аудандық орталық ауруханасының лауазымды тұлғаларына қатысты сотқа дейінгі тергеу бастады», - деді ол агенттіктің баспасөз қызметі алаңында өткен брифинг барысында.
Оның атап өтуінше, тергеу COVID-19 пандемиясы жағдайында эпидемияға қарсы шаралар үшін осыған дейін еңбекақыға аударылған қосымша үстемақыдан ақша иемдену фактісі бойынша жүргізіліп жатыр.
«ҚР Қылмыстық іс жүргізу кодесінің 201-бабына сәйкес тергеу мүддесі үшін өзге ақпарат жарияланбайды», - деді Қайсар Баржақсынов.
1033 рет оқылды
