03 шіл, 2023 сағат 14:51

Астана әкімі ірі жобаларды жүзеге асыруға жұмсалатын қаржы туралы айтты

Фото: elements.envato.com

Астана әкімі Жеңіс Қасымбек елорда мәслихатының кезектен тыс сессиясында алдағы бірнеше жылда ірі жобаларды жүзеге асыруға жұмсалатын қаржы туралы айтты, - деп хабарлайды "Ұлт ақпарат" Tengrinews.kz сайтына сілтеме жасап.

Бүгінде елордада жүзеге асырылып жатқан шығынды жобалардың бірі – LRT құрылысы. Басқа жобалар, мысалы, ЖЭО-3 пен кәріз құрылысын салу да осыдан кем емес қаржыны қажет етеді.

"Шындықты айту керек: LRT құрылысын аяқтау үшін бізге сонша қаржы керек. Алдағы екі-үш жылда 250-300 миллиард теңге. Жылу электр орталығын аяқтау үшін де жүздеген миллиард теңге қажет. Кәрізге келетін болсақ, бұл - сұмдық сома. Тіпті айтқым да келмейді, жүздеген және жүздеген миллиард теңге", - деді Қасымбек.

Кезектен тыс сессияда депутаттар Астана қаласының 2023-2025 жылдарға арналған бюджетіне өзгерістер мен толықтырулар енгізу туралы мәселені қарады. Жеңіс Қасымбек осы кезеңде қазынаға қосымша қаржы тартылатынына сенім білдірді.

"Президенттің ерекше назарының көмегімен қаржы органдары, Үкімет пен өзге де салалық министрліктер арқылы 2024-2026 жылдарға арналған бюджетке қосымша қаржы тартамыз деп үміттенеміз. Жалпы, алдағы 2-3 жылда бюджетті толықтыру қиын болады деп күтіледі", - деді елорда әкімі.