Алматының 2-ші жылу электр орталығын толық газға көшіру 2026 жылы аяқталады. Бұл туралы брифинг барысында ҚР Энергетика министрі Болат Ақшолақов мәлім етті, деп хабарлайды ҚазАқпарат.
Министрдің сөзінше, «Самұрық Қазына» қоры Қазақстанның бірыңғай энергетикалық жүйесіндегі жиілік пен қуатты реттеу мүмкіндігімен Алматының 2-ші жылу электр орталығында қуаты 600 МВт-қа дейінгі бу-газ қондырғысын салу жобасын іске асыру жөнінде ұсыныс берді.
«Алматы ЖЭО-2-ні толық газға көшіру 2026 жылы аяқталады деп жоспарлануда. Қор алғашқы іске қосу кешенін (бу-газ қондырғысы - 200 МВт) 2023 жылдың соңына қарай пайдалануға беруді көздеп отыр», - дейді Болат Ақшолақов.
Сонымен қатар, ол мемлекеттік сараптама нәтижелері бойынша жобаның құны 324 млрд теңге екенін атап өтті.
«Сондай-ақ «Самұрық-Қазына» бу-газ қондырғыларын сала отырып, 1-ші және 3-ші жылу электр орталықтарын кеңейтуді жоспарлап отыр. Алматының 1-ші жылу электр орталығын ауыстыру жобасы жалпы қуаты 250 МВт-қа дейін бу-газ қондырғыларын орнату арқылы станцияны кеңейтуді көздейді. Қазіргі уақытта жобаның техникалық-экономикалық негіздемесін әзірлеу бойынша жұмыстар жүргізілуде», - дейді министр.
Болат Ақшолақов Алматы ЖЭО-3 жылу электр орталығын реконструкциялаудың барлық ықтимал технологиялық нұсқаларын талдау үшін «Алматы электр станциялары» компаниясы жанынан жұмыс тобы құрылғанын айтты.
Бүгінгі таңда жобаның техникалық-экономикалық негіздемесі әзірлену үстінде.
617 рет оқылды
_140_110.jpg)
