Фото: Almaty.tv
«Тар көшемізді кеңейтеміз деп, айыппұл арқаладық». Талғар ауданы Панфилов ауылдық округіне қарасты Қарабұлақ ауылының тұрғындары осылай деп шағым айтты, деп хабарлайды Almaty.tv тілшісі.
Тұрғындардың сөзіне сенсек, тар көшенің бойымен жүйткіген көлік те, ойнақ салған бала да, жасы келген қария да қатар жүруге мәжбүр. Мұнда жол-көлік оқиғалары да жиі тіркеледі екен. Сондықтан жергілікті белсенді тұрғындардың бастамасымен жолды кеңейтпек болған.
"Көшеміз өте тар. Мен мұнда жиырма жылдан бері тұрамын. Бұрын көлік сирек еді. Ал қазір ары-бері қатынайтындар өте көп. Жақын маңда мектеп бар, балаларға да қиын. Қыста абайсызда аяқтары тайып, көлік қағып кете ме деп тағы алаңдаймыз. Сондықтан көшемізді кеңейткіміз келген", – дейді Қарабұлақ ауылының тұрғыны Ольга Кукличева.
Тұрғындардың айтуынша, қарабұлақтықтар өзара жиналыс өткізіп, көпшілік «жолды кеңейту қажет» деген ұйғарымға келген. Сол жерде қол жинап, толтырылған хаттаманы жергілікті әкімдікке тапсырған. Бірақ құрылыс жұмыстары басталғанда учаскелік полиция келіп, белсенді тұрғынның біріне әкімшілік айыппұл салып кеткен.
"Көршіміздің ешқандай кінәсі жоқ. Тек игі іс жасаймын деген ойы болған. Бірақ айыппұл арқалап қалды. Мәселен, мен өзім мұндай іске араласпайтын едім. Ал ол кісі барлық жауапкершілікті өз мойнына алып, көршілеріне жақсылық жасағысы келген. Жағдайдың бұлай болғаны өкінішті", – дейді Ольга Кукличева.
Алайда көршісін жақтағандардан бөлек, даттағандар да табылды. Кейбірінің сөзіне сенсек, зейнеткер жергілікті билік өкілдерінің халық үшін атқарған ісін үнемі жоққа шығарумен келген.
"Ауылдықтардың жағдайын ойлап, қамын жейтін адам болып көрінгісі келеді. «Қарабұлақтың жағдайын мен жасап отырмын» дейді. Ал негізі көшеге жарық қойып, жол салған - әкімдік қызметкерлері", – дейді Қарабұлақ ауылының тұрғыны Гүлшат Халилова.
Ал Панфилов ауылдық округінің әкімшілігіндегілердің айтуынша, тұрғынға айыппұл инфрақұрылым нысандарының бұзылып, жасыл желектің зақымданғаны үшін салынған.
"Әкімдік қызметкерлері бұл кісіге ауызша ескерту жасайды. Бірақ бұл кісі көнбегендіктен, келесі күні біз жергілікті полиция бөлімі қызметкерін жіберіп, айыппұл салынды. Сондай-ақ газ құбырын темірмен көтерген, – деді Панфилов ауылдық округінің әкімі Дулат Дәулетәлиев.
Ауылдық округ әкімінің сөзінше, Қарабұлақ халқынан өтініш түспеген. Егер тұрғындар тарапынан мұндай ұсыныс айтылса, іске асыруға дайын екендерін жеткізді.
505 рет оқылды
