2025 жылға қарай Қазақстан ішкі нарықты құс етімен толықтай қаматамасыз етеді. Бұл туралы ІХ халықаралық құс өсірушілер форумында ҚР Ауыл шаруашылығы бірінші вице-министрі Айдарбек Сапаров айтты, деп хабарлайды ҚазАқпарат.
«2025 жылға қарай құс еті бойынша импортты толықтай отандық өніммен алмастыру жоспарланған. Бұл тұрғыда жаңа құс фабрикалары салынып, қазір қолданыста тұрғандары жаңғыртудан өтеді», - деді Сапаров.
Оның айтуынша, 2021 жылдың қорытындысы бойынша 8 құс фабрикасы пайдалануға берілген. Жобалардың жалпы құны 40 млрд теңгені құрады. Ал жаңадан құрылған жұмыс орындары 500-ге жуықтаған.
Өз кезегінде Қазақстан құс өсірушілері одағының президенті Руслан Шәріпов еліміздің бірнеше өңірінде фабрикалар салынып жатқанын айтты.
«Менің ойымша, алдағы екі-үш жылда құс етімен ішкі нарықты толықтай қамтамасыз етеміз. Сонымен қатар, үйрек пен қаз өсіретін шаруашылықтар да елімізде біртіндеп дамып келе жатыр», - деді Шәріпов.
Биыл Қазақстанда құс өсіру саласында оң көрсеткіштер байқалып отыр.
Бұған дейін хабарланғандай, құс жемінің қымбаттауына байланысты құс өсірушілер қиындыққа тап болған.
«Құс жемінің бір тоннасы 180-190 мың теңгеге жетті. Құс еті мен жұмыртқаның өзіндік құнының 70 пайызы жемнің бағасына қатысты болады. Егер құс жемі арзан болса, онда біздің өнім де нарыққа төмен бағамен шығады», - деді Шәріпов.
776 рет оқылды
_140_110.jpg)
