Ақтөбеде жүргізуші оқушыны көлікпен қағып, оқиға орнынан қашып кетті, деп хабарлайды Polisia.kz Telegram-арнасы.
14 сәуір сағат 22:40 шамасында Ваз-2114 автокөлігі Әбілқайыр хан даңғылы мен Пацаев көшесінің қиылысында бағдаршамның тыйым салу сигналына өтіп, кәмелетке толмаған жаяу жүргіншіні қағып, жол-көлік оқиғасы болған жерден қашып кеткен.
"Салдарынан 17 жастағы жасөспірім ауруханаға жеткізілді.
Полиция қызметкерлері іздеу іс-шараларын жүргізу барысында автокөлікті Әбілқайыр хан даңғылындағы көпқабатты үйдің ауласынан әйнегі, бампері, капоты зақымданған күйінде тапты. Көлік арнайы автотұраққа қойылды.
Сондай-ақ, көлікті жүргізген адам анықталды. Ол жүргізуші куәлігі жоқ 18 жастағы жас жігіт болып шықты" - делінген ІІМ баспасөз қызметі хабарламасында.
ҚР ҚК 345-бабы 2-бөлігіне сәйкес сотқа дейінгі тергеу жұмыстары жүргізіліп жатыр. Жүргізуші 2 жылға дейін бас бостандығынан айырылуы мүмкін.
640 рет оқылды
