10 мау, 2022 сағат 17:40

Ақтөбеде "Гарант 24 Ломбард" пирамидасына қатысты айыпталушылар үйқамаққа алынды

Сурет: diapazon.kz

"Гарант 24 Ломбард" пирамидасына қатысты айыпталушылар үйқамаққа алынды. Ақтөбеде былтыр маусымда "Гарант 24 Ломбард", "Выгодный займ" және басқа да қаржы пирамидаларының айыпталушыларына қатысты сот басталған еді, - деп хабарлайды Tengrinews.kz агенттігі "Диапазон" басылымына сілтеме жасап.

Басылым мәліметінше, қылмыстық істе 3786 том бар. Соттан барлығы 17 мың 268 жәбірленушіден жауап алуы керек. Сотталушылар саны - 48 адам, олардың 31-іне бұлтартпау шарасы тағайындалған. Бірақ ҚІЖК нормалары бойынша, сот бұл бұлтартпау шарасын бір жылдан аса уақытқа ұзарта алмайды.

Ақтөбе облыстық сотының мәліметінше, 9 маусымда сот 31 айыпталушыға қатысты қамауға алу бұлтартпау шарасын үйқамаққа алуға өзгерту туралы қаулы қабылдады. Басқа облыстардан келген айыпталушылар үйіне бара алмайды. Олар сотқа қатысуы үшін Ақтөбеде үйқамақта болады. Уақытша баспананы үкімге дейін Ақтөбе облысының әкімдігі қамтамасыз етуі тиіс.

Еске салайық, 2020 жылғы ақпанда Ақтөбеде бірқатар ақтөбелік компанияның кеңселерінде ауқымды тінту жүргізілген болатын.