Фото: © РИА Новости / Нина Зотина
Орталық сайлау комиссиясының төрағасы Нұрлан Әбдіров республикалық маңызы бар қала және аудан әкімдерінің сайлауы 5 қарашада өтетінін мәлімдеді.
Саясаттанушы Мақсат Жақаудың айтуынша, әкімдердің сайлануы - саяси реформаның нәтижесі.
"Сонымен 5-қарашада еліміз алғаш рет жергілікті билікті өзі сайлай бастайды. Дәл солай, былтыр басталған саяси реформалардың аясында, Президенттің бастамасымен қазақстандықтар 17 аймақта 45 ауданның және республикалық маңызы бар қалалардың әкімдерін тікелей сайлау арқылы анықтай алады. Бұл - демократиялық жариялықтың арқасында жергілікті атқарушы билікті халық сайлайды деген сөз" - деп жазды саясаттанушы өзінің Facebook парақшасында.
Оның сөзінше, билік орталықсыздандыруды күшейтіп жатыр. Тағайындалмалы әкімдердің орнына сайланбалы дәстүрмен аймақ менеджерлері, саяси тұлғалардың келу науқаны басталады.
"Бүгін Орталық сайлау комиссиясының арнайы отырысында, әкімдерді 25 жастан жоғары, мемлекеттік қызметтегі еңбек стажына қарай, кез-келген саяси партияның, немесе өзін-өзі ұсынушылардың қатысуымен жүзеге асыратыны туралы айтылды. Яғни, сайланбалы қағидалар әділдік, ашықтық және заңдылық нормаларымен орындалмақ.
Егер саяси даму тарихымен айтсақ, елімізде тұңғыш рет аудан мен қалалардың әкімдерін сайлау өтпек. Демократиялық сатылай дамудың үлкен бір қадамы, әкімдер сайлауы болса, саяси реформалардың нәтижеге қимылдап отырғаны емес пе?!
Бұл сайлаудан тек қазақстандықтар, еліміздің болашағы ұтады!" - дейді ол.
460 рет оқылды
