Қазақстанның Қаржы мониторингі агенттігі "Karuan" компаниясын рейдерлік жолмен тартып алғаны" туралы шағым түскенін растады. Бұған дейін кейбір жергілікті БАҚ бизнесмен Нұрша Кәкенов "экс-президент Нұрсұлтан Назарбаевтың інісі Болат Назарбаев бизнесімді тартып алды" деп шағымданғанын хабарлаған.
"БАҚ өкілдерінен түскен сұрауларға ҚМА 2022 жылдың 17 маусымында Алматы қаласы прокуратурасынан Алматы қаласы бойынша Экономикалық тергеу департаментіне Нұрша Кәкеновтен Karuan ЖШС-нің рейдерлік жолмен алынғаны туралы хабарлама түскенін хабарлайды. Өтініште көрсетілген дәлелдер тексеруге жатады, оның нәтижелеріне құқықтық баға беріледі", - делінген хабарламада.
ҚМА мәліметінше, басқа ақпарат жария етуге жатпайды.
Бұған дейін Kozachkov offside Telegram-арнасында Нұрша Кәкенов "Karuan" ЖШС құрылтайшыларының бірі болғанымен, оның үлесін тартып алғаны туралы ақпарат пайда болған. Арызданушы өз шығынын 150 миллион долларға бағалған.
Журналистің айтуынша, "Karuan" Маңғыстау облысында марганец өндірумен айналысқан. 2006 жылы оның жалғыз құрылтайшысы ретінде болып Болат Назарбаев қалды. Ал өткен жылы кәсіпорын жұмысын тоқтатты.
Айта кетейік, Болат Назарбаев – экс-президент Нұрсұлтан Назарбаевтың інісі. Қаңтар оқиғасынан кейін Нұрсұлтан Назарбаев қауіпсіздік кеңесі төрағасы қызметінен айырылып, кейбір туыстары мен серіктері жоғары қызметтерінен алынған. Кей ақпараттарға қарағанда, Болат Назарбаев 6 қаңтарда қазақ-қырғыз шекарасынан өтіп, Бішкек арқылы Дубайға ұшып кеткен.
Биыл сәуір айында Алматы облысындағы Almaty Steklo зауытын иелерінің бірі рейдерлік зорлық көргенін, кәсіпорындағы үлесінің жартысын Болат Назарбаев тартып алғанын мәлімдеген. Одан бұрын қаржылық мониторинг агенттігі Болат Назарбаевқа қатысы бар майнинг компанияларды анықтаған.
812 рет оқылды
_140_110.jpg)
