Бейжің Олимпиадасында шорт-тректен 500 метрге жүгіруден ерлер арасындағы жеңімпаздар мен жүлдегерлер анықталды, деп хабарлайды "Ұлт ақпарат" Olympic.kz сайтына сілтеме жасап.
Финалдық сында қазақстандық Абзал Әжіғалиев та өнер көрсеткен болатын. Ақтық бәсекеде ол мәре сызығын төртінші боп кесіп, жүлдеге сынық сүйем жерден тоқтады.
Аталған қашықтықта алтын жүлдені - Венгрия, күмісті - Ресей, қоланы Канада спортшысы иеленген.
Айта кетейік, Абзал - қысқа қашықтықтарға жүгіруден әлем кубогінің жеңімпазы әрі бірнеше дүркін жүлдегері. Ол Сочи және Пхченчхан Олимпиадаларына қатысып, А финалына алғаш рет Бейжің ойындарында шыққан болатын.
Әзірге Әжіғалиев қазақстандық шорт-трекшілердің Олимпиададағы ең ірі жетістігін тіркеп отыр. Бұған дейн отандық шорт- трек шеберлері Олимпиадада төрттікке енген емес.
Сондай-ақ, осыған дейін Әділ Ғалиахметов 1500 метрге жарысудан финалда бақ сынап, сегізінші орын алған болатын.
1113 рет оқылды
