Астана әкімдігі Абу-Даби Плазаның құрылысына сапасыз материалдар қолданылған деген ақпаратты жоққа шығарды, деп хабарлайды елорданың ресми сайты.
Әлеуметтік желі пайдаланушылары Абу-Даби Плаза кешенін салу барысында сапасыз материал қолданылады деп аталатын белгісіз адам түсірген видеомен белсенді түрде бөлісіп жатыр.
"Жоғарыда айтылған видео, мамандардың айтуынша, болжаммен Оңтүстік-Шығыс Азия елдерінің бірінде түсірілген. Видео роликте көрсетілген құрылыс бағандарында ағаш төсеніштер пайдаланылған, бәлкім бамбуктан салынған шығар. Бұдан бөлек, видеода құрылыс жұмыстары жаз мезгілінде жүргізілгені анық көрініп тұр", — деп жазылған хабарламада.
Елорда әкімдігі түсіндіргендей, Абу-Даби Плаза кешені құрылысында жоғарыда көрсетілген материалдар қолданылмайды. Құрылыс жұмыстарының сапасын техникалық және авторлық тараптар тұрақты түрде бақылап отыр. Сондай-ақ, инженерлік-техникалық қызметкерлердің қауіпсіздігі қатаң сақталады.
Астана әкімдігі әлеуметтік желі қолданушыларын ескерткендей, 2015 жылдың 1 қаңтарынан бастап жаңа Қылмыстық кодекс күшіне енген, соған сәйкес жалған ақпарат беру, тарату және пайдалану қылмыстық жауапкершілікке әкеп соғады.
2175 рет оқылды
