Ішкі істер министрлігінің ұйымдасқан қылмысқа қарсы күрес және өзіндік қауіпсіздік жөніндегі бөлімшелері Алматы қаласының халықаралық әуежайы арқылы Біріккен Араб Әмірліктеріне бағалы металдарды заңсыз әкетуді жүзеге асырмақ болған қылмыстық топ қызметінің жолын кесті, – деп хабарлайды Polisia.kz.
Контрабанда мемлекеттік бақылауды айналып өтіп, көлік полициясының лауазымды тұлғаларына пара беру арқылы жүзеге асырылған.
"Алматы қаласының халықаралық әуежайында Көліктегі полиция департаментінің Ұйымдасқан қылмысқа қарсы күрес басқармасының қызметкеріне кедендік және шекаралық бақылау аймағы арқылы “сәлемдемені” алып өтуі үшін 600 АҚШ доллары сомасында пара беру әрекеті кезінде Қазақстан Республикасының азаматы ұсталды. Жеке тексеру барысында одан 1200 АҚШ доллары тәркіленді.
Жедел-іздестіру шараларын жүргізу нәтижесінде әуежай ғимаратында ҚХР азаматы ұсталды, ол күдіктінің сыбайласы бола отырып, алтынды әуе арқылы Алматыдан Дубайға жеткізуі керек болған. Полиция қызметкерлері оның сөмкесінен салмағы 3 кг 200 гр. болатын алтын құймаларын тапты. Құны шамамен 84 млн теңгеден асады" - делінген хабарламада.
Тергеу сотының санкциясымен қазақстандық күдіктінің тұрғылықты жері бойынша Алматыдағы коттедждердің бірінде тінту жүргізіліп, құймалардағы алтын мен металдың мөлшерін анықтайтын электрондық таразы мен арнайы құрылғылар тәркіленген.
Қазіргі уақытта күдіктілерді уақытша ұстау изоляторына қамау туралы мәселе шешіліп жатыр. Тергеу қымбат металдың шығу көзін және қылмыстық топтың басқа да сыбайластарын анықтауда.
658 рет оқылды
