Инвестициялар және даму министрі Жеңіс Қасымбек министрлік пен Ұлттық банк жаңа ипотекалық бағдарламаны іске асыру механизмін үкіметтің келесі отырысына дейін дарялауы керектігін айтты, - деп хабарлайды kaz.tengrinews.kz тілшісі.
"Баспана сатып алғысы немесе оны жақсартқысы келетін азаматтарды ынталандыру керек, сондықтан премьер-министр нақты уақытты белгіледі. Біз Ұлттық банкпен бірге бір апта ішінде осы мәселені жүзеге асырудың нақты механизмін даярлауымыз қажет", - деді Қасымбек.
Оның сөзінше, жекеменшік банктерді Тұрғын үй құрылыс жинақ банкі немесе жаңа ипотекалық компания шарттары бойынша жұмыс істеуге міндеттеу мүмкін емес.
"Кеше Елбасы айтқандай, жаңа компания жұмыс істейтін шарттар - 7 пайыз. Алғашқы жарна - 20 пайыз және кредит мерзімі - 25 жыл. Әрине бүгінгі күнмен салыстырғанда, ТҮҚЖБ-ның өзінде бастапқы жарна 30-дан 50 пайызға дейін. Бұл азаматтарды қолжетімді баспанамен қамтамасыз етуде үлкен серпін болмақ, өйткені, 7 пайыз қазіргі нарықтағыдан екі есе төмен. Жекеменшік банктерде 30, 50 пайызға дейін барады, ал мұнда тек 20 пайыз", - деп жалғастырды министр.
Министрдің пікірінше, Елбасының бастамасы ипотекалық кредит беру нарығын, құрылыс саласын және құрылыс материалдарын өндіруді дамытуға ықпал етеді.
"Тұрғын үй құрылыс жинақ банкі - еліміздегі ипотеканың шамамен үштен екісі. Нарықта тағы бір компанияның пайда болуы бәсекелестікті арттырады. Мұнда қалың кезектер болатынын түсінеміз. Кеше Елбасы нақты соманы белгіледі - үш триллион теңге. Бұл қаржы жеткілікті деп есептеймін", - деп аяқтады министр.
Еске салайық, Қазақстан Президенті Нұрсұлтан Назарбаев көпшілік үшін баспана ипотекасын қолжетімді ететін жаңа "7-20-25" бағдарламасын ұсынды.
3088 рет оқылды
