Маңғыстау облысында коронавирус инфекциясының таралуының алдын алу мақсатында 30 наурыздан бастап бірқатар шектеу шарасы енгізілді, деп хабарлайды "Ұлт ақпарат".
Облыстың бас санитарлық дәрігері Ерғали Садымановтың қаулысымен Полиция департаментіне келесі шараларды қолға алу тапсырылды:
- енгізілген шектеулердің сақталуын қадағалау бойынша патрульдеуді ұйымдастыру және азаматтардың қоғамдық орындарда жүруін болдырмау.
- карантиндік аймақтың толықтай қоршалуын қамтамасыз ету. Ақтау аумағына жаяу кіру мүмкіндігін кесу.
- карантиндегі тұлғаларды талаптарды бұзғаны үшін жауапкершілікке тарту.
- қоғамдық аумақтарды бақылау, аумақтардың жарықтандырылуын және бейнебақылаумен қамтамасыз етілу шараларын күшейту;
- полицияның барлық жеке құрамын жұмылдыру, қажет болған жағдайда өзге құрылымдардың күшін бөлу.
- төтенше жағдай кезінде қылмыспен күрестің және сот әділдігін жүргізудің, заңдылықты, құқықтық тәртіпті қамтамасыз ету жөніндегі іс-қимыл алгоритмін даярлау.
- арандату ақпараттарын және қауесеттердің жолын кесу жөніндегі жұмысты ерекше бақылауға алу. Осындай мәліметтерді таратудың кез келген түрін қатаң тыйып, авторларын анықтап, жазалау.
Сонымен қатар сағат 19.00-ден 08.00-ге дейін қоғамдық көліктің қозғалысына шектеу қойылады.
Бұдан бөлек,
- тұрғындардың өз пәтелерінен шығуына (тек ерекше қажеттілік болғанда ғана - дүкенге, дәріханаға, қоқыс төгуге және жұмысқа баруға рұқсат етіледі);
- көршілердің, туыстардың, әріптестер және тағы басқалардың бір-біріне баруына:
- азаматтардың саябақтар, алаңдар, балалар және спорт алаңдарына баруына;
- әуежай, теміржол, автовокзалдарға шығарып салушылар мен күтіп алушылардың кіруіне;
- интернет және ойын клубтарының өзге де халыққа қызмет көрсететін орындардың жұмысына шектеу енгізіледі.
Сонымен қатар,
- Ақтау-Жаңаөзен-Ақтау, Ақтау-Тұщықұдық-Шебір-Ақтау, Ақтау-Ақшұқыр-Ақтау, Ақтау-С.Шапағатов-Ақтау, Шетпе-Жаңаөзен-Шетпе, Бейнеу-Атырау-Бейнеу, Боранқұл-Құлсары-Боранқұл бағыттарындағы қалааралық автобустардың;
- 657/658 «Маңғыстау-Бейнеу» бағытындағы пойыздың қозғалысына шектеу қойылды.
1659 рет оқылды
