Qazaqstan Ulttyq banki teńgeniń aiyrbas baǵamyn erkin ainalymǵa jiberý ózin aqtady, al ulttyq valiýta baǵamynyń tómendeýi álemdik trendterdiń yqpalynan bolyp otyr dep biledi. Bul jaiynda ulttyq banktiń 3 tamyz kúni taratqan málimdemesinde aitylady.
"Sońǵy ýaqytta AQSh Federaldyq qor júiesi monetarlyq saiasatyn qatańdatyp, investitsiia syrtqa kete bastaǵan soń kóptegen damýshy elderdiń ulttyq valiýtalary qunsyzdana bastady. Bul jaǵdai Qazaqstanǵa da tán" delingen ulttyq bank málimdemesinde.
Ulttyq bank sonymen birge, "naryqtaǵy baǵa men ekonomikalyq ósimniń joǵarylaýy basqa da faktorlardyń keri áserin jeńildetkenin" aitady. Osynyń sebebinen teńgeniń dollarǵa shaqqandaǵy baǵamy "salystyrmaly túrde arzandaǵan".
Ulttyq bank málimdeýinshe, AQSh Federaldyq qor júiesiniń mólsherlemesi artqan tusta kóp investor damýshy elderdiń naryǵyna aqsha salǵannan góri AQSh-tyń qazynashylyq obligatsiialaryn ielengisi keledi. "Qazaqstan álemdik qor naryqtaryna qosylǵandyqtan álemdik trendter jergilikti naryqtaǵy jaǵdaiǵa áser etpei qoimaidy" delingen málimdemede.
Saýda balansynda rezidentterdiń eksporttyq tabysy artqanyna qaramastan, Qazaqstannyń qazirgi tólem balansy sheteldik investorlar qarjysyn shyǵaryp áketken soń nasharlaǵan. Ulttyq bank esebinshe, 2017 jyly rezident emesterge tólengen tabys tólemi 19 milliard dollardy quraǵan.
Astana ulttyq valiýtanyń aiyrbas baǵamyn 2015 jyly tamyzda erkin ainalymǵa jibergen. Ulttyq bank bul saiasat ekonomikada disbalans týyndaýyna jol bermei, otandyq óndirýshilerdi básekege qabiletti qylady, ekonomikany "dollarsyzdandyrady" deidi.
Qazaqstan qor birjasynda (KASE) 3 tamyz kúni tańerteńgi saýda sessiiasynda dollardyń ortasha baǵamy 349 teńge 81 tiyn boldy. Almatydaǵy aqsha aiyrbastaý pýnkterinde dollar 349 teńge 50 tiyn men 351 teńge 50 tiyn aralyǵynda satylyp jatyr.
