QR májilisiniń depýtaty, ekonomikalyq reforma jáne óńirlik damý komitetiniń tóraǵasy Nurtai Sabilianov jekeshelendirýge shyǵarylǵan iri nysandardy satý kezinde týyndap otyrǵan birqatar máseleni atap ótti, dep habarlaidy Sputnik Qazaqstan tilshisi.
Sabilianovtiń aitýynsha, qazirgi tańda jekeshelendirýge shyǵarylǵan iri nysandardy ótkizý qarqyny tómen bolyp otyr. TOP-65 tizimindegi 65 uiymnyń tek 14-i ǵana satylǵan. Depýtat osy oraida bir millionnan asa salymshynyń aqshasy saqtalǵan "Turǵyn úi qurylys jinaq bankin" jekeshelendirý máselesin taǵy da pysyqtaýdy usyndy.
"Samuryq-Qazyna" ulttyq qorynyń 7 iri kompaniiasyn 2020 jyldyń sońyna deiin IRO-ǵa shyǵarý josparlanyp otyr jáne olardyń satylýyna aldyn ala muqiiat daiyndalý kerek. Sondyqtan "Turǵyn úi qurylys jinaq banki" AQ men "Qazagroqarjy" AQ-ny jekeshelendirýde qarjy ministrligi, "Samuryq-Qazyna" jáne "Báiterek" ulttyq holdingterimen birlesip, bul máseleni taǵy da pysyqtaý qajet. Óitkeni "Turǵyn úi qurylys jinaq bankinde" shamamen 520 milliard teńgedei bir millionnan asatyn salymshynyń qarajaty bar. Banktiń aktivi de qazirgi tańda 768 milliard bolyp otyr. Sondyqtan da jekeshelendirgende kredit berý sharttary ózgermei me degen oryndy suraq týyndaidy. Salymshylar úshin memlekettik syiaqy tóleýdiń taǵdyry ne bolady?", — dep alańdady Sabilianov májilistegi úkimet saǵatynda.
Onyń aitýynsha, qazirgi jaǵdaida bizdegi kóptegen jekemenshik banktiń jumys isteý tásili tiimdi emes. Memlekettik bankten jaqsy jumys istep jatyr dep aitýǵa bolmaidy.
Depýtat "Qazagroqarjy" AQ-ny jekeshelendirýge de basa mán berý kerektigin atap ótti. Sebebi bul nysandy da satýda birqatar másele bar.
"Qazagroqarjy" AQ nesie portfeli 237 milliard teńgeni qurap otyr. Onyń ishinde 72 mlrd teńge Ulttyq qordan berilgen qarajat. Osyǵan bailanysty mynany naqtylaý qajet: bul aqshanyń taǵdyry qalai bolady jáne ol qarjy qaitaryla ma? "Qazagroqarjy" AQ-nyń qazirgi kezdegi qaryzdanýshylarynyń taǵdyry qalai bolmaq? Óitkeni qazirgi ýaqytta olardyń sany 6,5 myń bolyp otyr. Osyǵan baianysty memlekettik organdar ulttyq basqarýshy holdingtermen birlesip, bank salymshylary men aýyl sharýashylyǵy ónimderin óndirýshilerin qorǵaý jóninde sharalar qabyldaý qajet", — dep atap ótti ol.
Sonymen qatar, onyń aitýynsha, jekeshelendirý obektilerine kezinde salynǵan qarajattyń kútiletin qaitarylymy boiynsha da másele bar. Bul oraida jekeshelendirý nysandaryn baǵalaýdy júzege asyrý máselesi týyndaidy. Máselen balanstyq quny joǵary jáne memlekettik qarajat esebinen qalyptastyrylǵan qomaqty jarǵylyq kapitaly bar jekeshelendirý nysandary jarǵylyq kapitaly men balanstyq qunynan áldeqaida tómen baǵalanǵan. Osyǵan ailanysty depýtat jekeshelendirý nysandaryn baǵalaý kezinde nysandardyń naryqtyq qunynyń balanstyq qunynan tómen bolýyna múmkindik beretin zańnamalyq aktilerdiń normalaryn qaita qaraýdy usyndy.
