Reseidiń Kemerovo qalasyndaǵy «Zimniaia vishnia» saýda úiinde bolǵan alapat órt pavlodarlyqtardyń ómirin jalmady, dep habarlaidy Baq.kz aqparat agenttiginiń óńirdegi tilshisi.
Bul qaiǵyly aqparatty qaza tapqandardyń týǵan-týysqandary men tanystary rastady.
«Saýda úiinde Pavlodar qalasynyń №16 litseiinde oqyǵan ápkemniń klastasy da kóz jumdy. Natalia Ýstinova oqýyn úzdik támamdady. Ol jat jerde 4 jasar qyzy Ýliana Ýstinovamen birge ajal qushty», - deidi Veronika Goncharýk.
Búgingi tańda Natalia men Ýliana Ýstinovalar saýda úiinde qaitys bolǵan jáne tabylǵandardyń tiziminde bolǵany belgili.
Aita keteiik, tótenshe oqiǵa kezinde 57 jasar Pavlodar turǵyny, Natalia Ýstinovanyń anasy Marina Baranova da qaitys boldy. Azamat eńbek demalysyna Kemerovo qalasyna qydyryp barǵan. «Pavlodar-Vodokanal» JShS qyzmetkeriniń úsh nemeresi de kóz jumdy.
Eske sala ketsek, osydan eki jyl buryn Frantsiianyń Nitstsa qalasynda bolǵan teraktide de pavlodarlyq otbasy qara jamylǵan bolatyn. 50 jasar Liýbov, 33 jasar Marina men úsh jasar Silviia lańkestik árekettiń qurbany boldy.
