Qazaqstan turǵyn úidi qoldanysqa berý boiynsha TMD elderi ishinde eń joǵary kórsetkishke jetti. Bul týraly QR IIDM qurylys jáne turǵyn-úi kommýnaldyq sharýashylyq isteri komitetiniń tóraǵasy Marhabat Jaiymbetov aitty, dep habarlaidy QazAqparat.
«2019 jyly turǵyn úi qurylysyna salynǵan investitsiia kólemi 17 paiyzǵa artyp, 1,4 trln teńgeni qurady. Investitsiialardyń aitarlyqtai kólemi «Nurly jer» baǵdarlamasy boiynsha rekordtyq 13,1 mln sharshy metr turǵyn úidi tapsyrýǵa jáne respýblikanyń turǵyn úi qoryn 116 myń baspanaǵa jańartýǵa múmkindik berdi», - dedi Marhabat Jaiymbetov OKQ-da ótken baspasóz máslihatynda.
Komitet tóraǵasynyń aitýynsha Qazaqstan turǵyn úidi qoldanysqa berý jaǵynan TMD elderi ishinde eń joǵary (Qazaqstan – 0,71 sh.m, Resei - 0,54 sh.m., Belarýs - 0,40 sh. m., Ózbekstan - 0,36 sh. m.) kórsetkishterdiń birine ie bolyp otyr.
«Nurly jer» baǵdarlamasy iske asyrylǵan úsh jylda 50 myńnan astam otbasy (2,9 mln sharshy metr) áleýmettik turǵyn úimen qamtamasyz etildi. 16 myń azamat «7-20-25» ipotekalyq baǵdarlamasyna qatysty. Azamattarǵa jeke turǵyn úi salýǵa bólinetin 130 myń jer ýchaskesi injenerlik kommýnikatsiialarmen qamtyldy. «Baqytty otbasy» baǵdarlamasy ótken jyldyń maýsym aiynda bastalyp, 5 myń múgedek balasy bar, kópbalaly jáne tolyq emes otbasylaryna turǵyn úi jaǵdaiyn jaqsartýǵa múmkindik berdi. 2020-2023 jyldary 40 myń otbasyna qoldaý kórsetý josparlanyp otyr. Bul jyl saiyn 10 myń otbasyny quraityn bolady», - deidi ol.
Marhabat Jaiymbetov óz sózinde halyqtyń áleýmettik osal toptarynyń, atap aitqanda jetim balalardyń, múgedekter men basqa sanattaǵy azamattardyń turǵyn úi máselesi erekshe baqylaýda turǵanyn atap ótti.
«Memleket basshysynyń tapsyrmasy boiynsha úsh jyl ishinde ásirese az qamtylǵan kópbalaly otbasylardy baspanamen qamtamasyz etýdi josparlap otyrmyz. Bul úshin turǵyn úi zańdaryna zańnamalyq túzetýler engizildi. Osylaisha «Nurly jer» baǵdarlamasy boiynsha qarjylandyrý tetikteri kózdeldi. Osy sanattaǵy 40 myńnan astam kezekte turǵandardyń ishinde 2019 jyly túrli tetikter boiynsha 7 387 otbasy turǵyn úimen qamtamasyz etildi», - dedi komitet basshysy.
.jpeg)