«Báiterek development» AQ Astana qalasyndaǵy «EKSPO-2017» halyqaralyq mamandandyrylǵan kórmesi aýmaǵynda ornalasqan turǵyn úi keshenderindegi páterler men kólik turaǵy oryndarynyń qunyn táýelsiz konsalting kompaniiasynyń kómegimen anyqtady, dep habarlaidy "Ult aqparat" «Báiterek development» AQ baspasóz qyzmetine silteme jasap.
«EKSPO-2017» aýmaǵyndaǵy turǵyn úi keshenderindegi sharshy metrdi ótkizý quny 399 900 teńgeni, bir kólik turaǵy ornynyń quny 699 000 teńgeni quraidy. Bul obektiler ornalasqan jeriniń tiimdiligimen, qabattarynyń azdyǵymen, páterleriniń erogonomiialyq josparlanýymen erekshelenedi. Turǵyn úi oramynyń ishki aýmaǵy oqshaýlanǵan jáne qala turǵyny úshin jaily bolady», - dep habarlady «Báiterek development» AQ Basqarma tóraǵasynyń orynbasary Asqarbek Óserbaev.
Kompaniia 2018 jylǵy 1 maýsymnan bastap buryn «EKSPO-2017» kórmesiniń qatysýshylary men qonaqtarynyń turýyna arnalǵan bir, eki, úsh jáne tórt bólmeli páterlerdi satýǵa shyǵarady.
«Satyp alý sharttaryna keletin bolsaq, áleýetti satyp alýshylarǵa qoiylatyn jalǵyz talap: jeke tulǵalar úshin - tólem qabilettiligi jáne Qazaqstan Respýblikasynyń azamaty bolýy qajet, al zańdy tulǵalar úshin - Qazaqstan aýmaǵynda tirkelýi jáne qyzmetin júzege asyrýy shart», - dep qosty kompaniia ókili.
«EKSPO-2017» halyqaralyq kórmesi aýmaǵynda taza árlengen páterdi birneshe tásildermen: qolma-qol aqshasyz tóleý arqyly óz qarajattary esebinen nemese ekinshi deńgeidegi bankter arqyly ipotekaǵa, sondai-aq «Qazaqstannyń turǵyn úi qurylys jinaq banki» AQ qaryzy esebinen satyp alýǵa bolady.
«Turǵyn úidi jáne mashina oryndaryn satyp alýǵa ótinimder qabyldaý protsesi onyń aiqyndylyǵyn qamtamasyz etý maqsatynda «Digital Baiterek» platformasy arqyly onlain rejimde júzege asyrylatyn bolady. «Báiterek development» AQ rieltorlyq kompaniialarmen yntymaqtastyq jasamaitynyna jáne portal arqyly ótinimderdi tirkeý jáne resimdeý úshin tólemaqy almaitynyna áleýetti satyp alýshylardyń nazaryn airyqsha aýdarǵymyz keledi», - dedi A.Óserbaev.
Sonymen qatar turǵyn úi kesheninde «shoý-rým» jumys isteidi, munda áleýetti satyp alýshylar páterlerdiń josparlanýymen tanysady, qajetti keńes alady jáne jyljymaityn múlikti satyp alýǵa ótinim resimdeidi.
Anyqtama: 2014 jyldan 2016 jylǵa deiin «Báiterek development» AQ EKSPO-2017 halyqaralyq kórmesi aýmaǵynda turǵyn úilerdiń jáne saýda oiyn-saýyq ortalyǵynyń qurylysyn qarjylandyrdy. 42 úiden turatyn, alańy 110,7 myń sharshy metr bolatyn turǵyn úi oramy «Liýks nedvijimost Group» jáne «BI Group» kompaniialarymen áriptestik negizde salyndy.
«Báiterek development» AQ - «Báiterek» Holdinginiń enshiles uiymy - «Nurly jer» turǵyn úi qurylysy baǵdarlamasy sheńberinde jergilikti atqarýshy organdardyń obligatsiialaryn satyp alý boiynsha jalǵyz qarjy operatory. Kompaniia Qazaqstan boiynsha kredittik jáne jalǵa beriletin turǵyn úilerdiń qurylysyn qarjylandyrady.
