2018 jyldyń 1 qańtaryndaǵy jaǵdai boiynsha elimizdegi halyq sany 18 157,1 myń adamǵa jetti. Sonyń ishinde qalalyqtar - 10 426,5 myń adam (57,4 paiyz), aýyldyqtar - 7 730,6 myń adam (42,6 paiyz), - dep habarlaidy "Ult aqparat" QR Ulttyq ekonomika ministrliginiń baspasóz qyzmetine silteme jasap.
Vedomstvo málimetinshe, bul kórsetkish 2017 jylǵy 1 qańtarmen salystyrǵanda 231,2 myń adamǵa nemese 1,3 paiyzǵa ósti.
"AHAT organdary usynǵan azamattyq hal aktileri jazbalaryndaǵy málimetterdi óńdeý nátijesinde, 2017 jylǵy qańtar-jeltoqsanda týylǵandar sany - 390,5 myń adam. Bul 2016 jylǵy qańtar-jeltoqsanǵa qaraǵanda 4,7 paiyzǵa az. Týýdyń jalpy koeffitsienti 1000 adamǵa 21,65", - delingen ministrliktiń habarlamasynda.
Sondai-aq, 2017 jylǵy qańtar-jeltoqsanda respýblika halqynyń tabiǵi ósimi 2016 jylǵy qańtar-jeltoqsanmen salystyrǵanda 17,0 myń adamǵa nemese 6,1 paiyzǵa kemip, 260,5 myń adamǵa jetkeni aitylady. Vedomstvo málimetinshe, tabiǵi ósimniń jalpy koeffitsienti 1000 adamǵa shaqqanda 14,44 adamǵa teń boldy.
Al qaitys bolǵandar sany jaily málimetke qaraǵanda, ólim-jitimniń jalpy koeffitsienti 1000 adamǵa 7,21 adam.
Baspasóz qyzmetiniń málimetinshe, 2017 jylǵy qańtar-jeltoqsanda respýblikada 1 jasqa deiingi 3150 náreste ólimi tirkeldi.
"2016 jylǵy qańtar-jeltoqsanmen salystyrǵanda 1 jasqa deiingi shetinegen náreste sany 10,6 paiyzǵa azaidy. Náreste ólim-jitiminiń negizgi sebebi - perinataldyq kezeńde paida bolatyn jaǵdailar, budan 2017 jylǵy qańtar-jeltoqsanada 1586 náreste qaitys bolyp, náresteler arasyndaǵy jalpy ólim sanynyń 50,3 paiyzǵa qurady. Týa bitken aýytqýlardan 731 nemese 23,2 paiyzǵa, tynys organdary aýrýlarynan -195 nemese 6,2 paiyzǵa jáne jazataiym jaǵdaidan, ýlanýdan jáne jaraqattan - 168 nemese 5,3 paiyzǵa náreste qaitys boldy. 2017 jylǵy qańtar-jeltoqsanda náreste ólim-jitiminiń koeffitsieti 1000 týǵandarǵa shaqqanda 8,07 boldy", - dep habarlady baspasóz qyzmetindegiler.
Kóshi-qon qyzmeti organdary usynǵan málimetterdi óńdeý nátijesinde, 2017 jylǵy qańtar-jeltoqsanda elimizge turǵylyqty turýǵa kelgenderdiń tirkelý sany 2016 jylǵy qańtar-jeltoqsanmen salystyrǵanda 20,5% kóbeiip, 16 081 adam qurady. Elimizden ketken kóship-qonýshylardyń tirkelý sany 7,8 paiyzǵa kóbeiip, 37 704 adam boldy, kóshi-qonnyń aiyrymy -21 623 adam.
Sondai-aq, elimizdegi negizgi kóshi-qon almasýynyń TMD memleketterimen ekeni aitylady.
- TMD elderinen kelgenderdiń úlesi - 72,1 paiyz;
- TMD elderge ketkenderdiń úlesi - 89,4 paiyz.
"Óńiraralyq kóship-qonýshylardyń úlesine elimizdiń jalpy ishki kóship-qonýshylar sanynyń 35,4 paiyzyn aldy. Óńiraralyq kóshi-qonnyń oń aiyrymy: Astana qalasy - 36 449 adam; Almaty qalasy - 31 775 adam; Aqmola oblysy - 1 544 adam qalyptasty", - dep habarlady vedomstvonyń baspasóz qyzmeti.
