Dimash Qudaibergen BGTalent (黑金经纪) prodiýserlik kompaniiasynyń negizin qalaýshy Shań Venjemen birge Hýnan telearnasynyń «Singer 2017» án baiqaýynyń finalyna arnalǵan sharanyń qyzyl kileminen júrip ótti, dep habarlaidy QazAqparat tilshisi.
Arnaiy taqtaǵa qoltańbasyn qaldyrǵannan keiin, júrgizýshiniń finalǵa daiyndyǵy týraly suraǵanda, «Assalaýmaǵaleikúm! Barshalaryńyzǵa úlken rahmet. Osy oraida sizderge tek alǵys bildire otyryp, sahnalyq áriptesim ózin moiyndata bilgen ánshi ekenin jetkizgim keledi. Menimen sahnany bólisip, qoldap, qolushyn bergenderińiz úshin úlken rahmet aitqym keledi», - dedi Dimash.
NTES News tilshisiniń «baiqaýdan qandai oryn alýdy qalaisyń» degen suraǵyna: «Meniń oiymsha, qandai da nátije bolmasyn, men qazirdiń ózinde jeńimpazbyn. Óitkeni meni qoldap, árqashanda demep júretin sizder barsyzdar. Sizder barda men árqashan jeńimpazbyn», - dep jaýap berdi Dimash.
Shań Venje tilshilerge óziniń osy sahnada qanshama óner kórsetse de tap qazirgi sátte qobaljyp turǵanyn jetkizdi. Sondai-aq, aqtyq básekede jaqsy nátije alatynyna senimdi ekenin aitty.
Eske sala keteiik, «Singer 2017» baiqaýynyń aqtyq básekesin 15 sáýir kúni Astana ýaqytymen 20:00 (jergilikti ýaqyt 22:00) de tikelei efirde kórsetedi. Sheshýshi básekede Dimash Shań Venjemen birge Maikl Djeksonnyń «Earth song» jáne «Dangerous» ánderin shyrqaidy.
