Elordada qazirgi tańda 1 mln 200 myń adam turaqty túrde turyp jatyr. Bul týraly halyqqa esep berý kezdesýinde Astana qalasynyń ákimi Áset Isekeshev aitty, dep habarlaidy «QazAqparat».
Halyqqa esep berý kezdesýinde shahar basshysy elordanyń áleýmettik-ekonomikalyq damýynyń 2017 jylǵy qorytyndylarymen tanystyrdy. Sharaǵa QR Premer-Ministriniń birinshi orynbasary Asqar Mamin qatysýda.
«Astana tez damyp kele jatqan qala. Adam sany ósýde. 1 mln 30 myńnan astam adam turady. Ótken jyly taǵy 233 myń adam ýaqytshaǵa tirkeldi. Demek, qalada turaqty túrde 1 mln 200 myń adam turyp jatyr. Bul san jyl saiyn ósýde. Sondyqtan, áli de bolsa sheshilmei jatqan máseleler bar. Degenmen, ótken jyly barlyq áleýmettik-ekonomikalyq indikatorlarǵa qol jetkizildi. Buǵan EKSPO-2017 halyqaralyq kórmesi zor áserin tigizdi», - deidi ákim.
Áset Isekeshevtiń aitýynsha, jańa temir jol vokzalynyń, áýejaidyń, jańa káriz júiesiniń salynýy elordanyń damýyna áserin tigizgen. Kórme ótken kezinde Astanaǵa 5 mln adam kelip, 47 meiramhana, 36 otel ashylǵan.
«Sońǵy 10 jylda qala turǵyndarynyń sany 400 myńǵa ósken. Salystyryp kórsek, halyqtyń osynsha sany Pavlodardyń nemese Óskemenniń turǵyndarymen birdei. Osynyń bári de bizge damýdyń dańǵyl jolyn tabýdy talap etedi», - dedi qala ákimi.
