Chempiondar Ligasynyń úshinshi irikteý kezeńi sheńberinde «Astana» klýby óz alańynda polshanyń «Legiia» komandasyn qabyldady. Tartysty ótken matchta elordalyq klýb 3:1 esebimen jeńiske jetti, dep habarlaidy "Ult aqparat".
Bul oiynda «Legiia» klýby favorit bolyp esepteldi. Alaida «Astana» óz alańynda senimdi oinady. Tipti komanda match bastalysymen-aq ótkir shabýyldar uiymdastyrdy. Biraq qarsylas komanda saýatty qorǵanyp, sáti túsken kezde «Astana» qaqpasyn nysanaǵa alyp turdy.
16 minýtta «Astana» komandasynyń shabýylshysy Djordje Despotovich (9) jaraqat aldy. Onyń ornyna Roman Mýrtazaev (45) shyqty. Soǵan qaramastan «Astana» klýby óz taktikasyn ózgertken joq.
24-shi minýtta elordalyq klýbtyń jartylai qorǵaýshysy Laslo Kliainhaislerdiń esep ashýǵa múmkindigi boldy. Alaida onyń tepken doby qaqpadan biik ketti.
Oiynnyń 36-minýtynda elordalyqtardyń shabýylshysy Jýnior Kabananga esep ashsa, alǵashqy taim aiaqtalar tusta Ivan Maevskii esepti eseledi.
Ekinshi taimda poliaktar sapynan Armando Sadiký esep aiyrmasyn qysqartqanymen, oiyn aiaqtalýǵa sanaýly sekýndtar qalǵanda Patrik Tvýmasi «Astana» jankúierlerine tamasha syi jasady.
«Astana» komandasyna 26 myń 100 jankúier qoldaý bildirdi.
«Astana» (Astana, Qazaqstan) - «Legiia» (Varshava, Polsha) 3:1 (2:0)
Goldar: Kabananga 36 (1:0), Maevskii 44 (2:0), Sadiký 79 (2:1), Tvýmasi 90+4 (3:1)
«Astana»: Mokin, Shitov, Anichich, Kliainhaisler (Grahovats 80), Mujyqov, Despotovich (Mýrtazaev 20, Postnikov 89), Maevskii, Tvýmasi, Logvinenko, Kabananga, Shomko.
«Legiia»: Maliaj, Pazdan, Dombrovski, Gilerme, Gloýshek, Kýharchik (Mihaliak 83), Nod (Paskýato 62), Hiamialiainen (Sadiký 70), Monchinski, Endjeichik, Mýlen.
Bas tóreshi: Tomash Bognar (Vengriia)
26 shilde. «Astana Arena» stadiony.
