Almatyda iývenaldy politsiia qyzmetkerleri tekseris barysynda turmysy nashar otbasyn anyqtady. Bul otbasyndaǵy úsh jastaǵy balalar kir kiimmen, ash kúide tabyldy, - dep habarlaidy "Ult aqparat" qalalyq IID-niń baspasóz qyzmetine silteme jasap.
Politsiianyń málimetinshe, turmysy nashar otbasy Almaly aýdanynda turyp jatyr. Inspektorlar kelgen sátte 1978 jyly týǵan otaǵasy tósekte jatqan jáne bóten adamdardyń kelgenine esh eleń etpegen. IID ókilderiniń sózinshe, ol qatty mas bolǵan, al janynda qyz jáne ul bala oinap otyrǵan eken. Bul kezde balalardyń anasy úide bolmapty.
"Úi apatty jaǵdaida, baraq tárizdi. Úide qoqys shashylyp jatyr. Balalardyń ústi kir, ash júr. 1977 jyly týǵan áieldiń, balalardyń anasynyń sózinshe, ol jumysta bolǵan. Balalardyń deni saý kórinedi, ekeýi de úsh jasta. Bul oqiǵaǵa bailanysty qajetti sharalar qolǵa alyndy. Ómirlerine qaýip tónip turǵandyqtan D. jáne A. esimdi balalar qalalyq Jasóspirimderdi beiimdeý ortalyǵyna jiberildi", - deidi Almaty IID-niń jergilikti politsiia qyzmeti iývenaldy bóliminiń basshysy, politsiia polkovnigi Láilá Álipbaeva.
Bólim basshysynyń sózinshe, otbasy turmysy nashar retinde aldyn alý esebine tirkeldi.
"Otbasy baqylaýǵa alyndy, nazarda júredi. Ata-anasy túzelýge ýáde etti. Mundai bolmaǵan jaǵdaida ata-analyq quqynan aiyrý máselesin kóteremiz. Óitkeni mundai turmys jaǵdaiy - balalardyń ómiri úshin úlken qaýip", - dep atap ótti Álipbaeva.
Iývenaldy politsiianyń bul siiaqty birikken sharalary barlyq aýdandarda turaqty júrgiziledi, onyń maqsaty - turmysy nashar otbasyn anyqtap, balalardyń quqyǵyn qorǵaý.
