Mańǵystaý oblysynda tsifrlyq saýattylyqty arttyrý kýrsy 2018 jyldyń 1-shi maýsymynda bastalǵan bolatyn. Shilde aiynyń basynda atalǵan seminar boiynsha 5216 turǵyn oqytylypty. Bul týraly Mańǵystaý oblysy ákimdiginiń baspasóz qyzmeti «Zerde» Ulttyq infokommýnikatsiia holdinginiń jýrnalisine bergen habarlamasynda aitty.
«Jospar boiynsha 5 myń adam tsifrlyq saýattylyq kýrsynan ótti. Oqytý jumystary 2018 jyldyń 1-shi maýsymynda bastalǵan edi. Ol aǵymdaǵy jyldyń 29-shy tamyzynda aiaqtalady. Aimaqtyq trenerlermen 3678 adam oqytylsa, mobildi top arqyly 1538 turǵyn tsifrlyq saýattylyqty meńgerdi», – delingen habarlamada.
Osy maqsatta oblysta 10-12 mamyr aralyǵynda 316 aimaqtyq trener daiarlanǵan eken. Olar informatika pániniń muǵalimderi. Oqytý jumystary «Tsifrlyq saýattylyq» boiynsha 4 baǵytty qamtydy. Budan ózge, ákimdiktiń uiǵarymymen 65 bilim mekemeleri anyqtalyp, turǵyndar sol ǵimarattarǵa baryp dáris tyńdaǵan. Osyǵan sáikes, 100 aýditoriia men 1300 kompiýter qarastyrylypty.
Baspasóz qyzmeti habarlaǵandai, QR Aqparat jáne kommýnikatsiialar ministrligi men «Zerde» ulttyq infokommýnikatsiia holdingimen jasalǵan kelisimge sáikes Aqtaý qalasynda 2500 adamdy oqytý josparlanǵan. Al, Jańaózen qalasy boiynsha 750 turǵyn, Túpqaraǵan, Beineý, Munaily, Qaraqiia aýdandary boiynsha 350 adamnan oqytylmaq.
Sonymen qatar, óńirde turǵyndardyń qońyraýlaryn qabyldaityn 10 kanaldy koll-tsentr nómiri iske qosylǵan (8/7292/30-12-82).
Óńirde tsifrlyq saýattylyqty arttyrý maqsatynda bilim basqarmasynyń bastamasymen 6 myń muǵalim men 66 myń ata-ana oqytylǵan. Dese de, maýsym-tamyz aralyǵynda taǵy 30 myń turǵyn oqý kýrsynan ótedi dep josparlanyp otyr. Buǵan qosa, 20 myń pedagog tsifrlyq saýattylyqty meńgermek.
Eske sala keteiik, tsifrlyq saýattylyq kýrstary elimizdiń túkpir-túkpirinde oqytylyp jatyr. Ol tsifrlyq HQO-lar men ártúrli memlekettik mekemelerde, sondai-aq bilim oshaqtarynda úiretilýde. «Tsifrlyq Qazaqstan» memlekettik baǵdarlamasynyń arqasynda halyqtyń tsifrlyq saýattylyǵy 2020 jylǵa qarai 85%-ǵa jetedi dep kútilýde. Tsifrlyq saýattylyq kýrsy arqyly memlekettik qyzmetti elektrondyq formatta paidalaný, onlain-saýdany meńgerý, tsifrlyq mashyq, ashyq úkimet syndy baǵyttardy meńgerýge bolady. Biyl 8 mln adam elektrondy qyzmet alý men onlain saýda júiesin oqý boiynsha bazalyq bilimmen qamtamasyz etilmek.
